যোৰহাট: দীপাৱলীৰ সময়ত বজাৰৰ জাকজমকীয়া লাইটেৰে বাসগৃহ সজাই তুলিলেও মাটি-চাকি অবিহনে যেন পোহৰৰ উৎসৱ আধৰুৱা । সেয়ে যিমানেই চীনা সামগ্ৰীয়ে চমক নিদিয়ক কিয় এই উৎসৱত সদায়েই সমাদৰ লাভ কৰে মাটিৰ চাকিয়ে । বিগত কেইবাবছৰৰ পৰা অসমৰ মৃৎশিল্পলৈ প্ৰত্য়াহ্বান আহি পৰিলেও এতিয়াও ৰাজ্য়খনৰ বহু ঠাইত আজোককাৰ বৃত্তিটোকে সাৱতি ৰক্ষা কৰিছে পৰম্পৰা ।
দীপাৱলীলৈ মাজত কেইটামান দিন । সমগ্ৰ দেশৰ লগতে অসমতো ঘৰে ঘৰে এই উৎসৱৰ প্ৰস্তুতি চলাইছে । যোৰহাট জিলাৰ এখন উল্লেখযোগ্য় ঠাই হৈছে নিমাতী ভিতৰ ককিলা কুমাৰ গাঁও । এই গাঁৱৰ কুমাৰ জনগোষ্ঠীয়ে অতীতৰে পৰা চলি অহা তথা শতিকা পুৰণি মৃৎশিল্পক চৰকাৰী সা-সুবিধা অবিহনে পৰাম্পৰাগতভাৱে ৰক্ষা কৰাত মনোনিবেশ কৰিছে ।
এই শিল্পটোকে প্ৰায় ১৫০ টা পৰিয়ালে জীৱিকাৰ একমাত্ৰ সম্বল হিচাপে গ্ৰহণ কৰি আহিছে। গাঁওখনৰ এজন বাসিন্দাই কয়," অতীতৰে পৰাই এই শিল্পৰ লগত আমি জড়িত হৈ আছো । সকলো প্ৰজন্মই প্ৰত্যাহ্বানৰ মাজতেই এই শিল্পক জীয়াই ৰখাত ব্ৰতী হৈ আছে ।"
- মাটি সংগ্ৰহৰ বাবে পৰিশোধ কৰিব লাগে ধন
আনহাতে,পৰম্পৰাগতভাৱে মহিলাসকলে কুমাৰ মাটিৰ পৰা বাচত-বৰ্তন তৈয়াৰ কৰে । পুৰুষসকলে বহু কষ্ট স্বীকাৰ কৰি মাটি সংগ্ৰহ কৰে । বহু দূৰৈৰ পৰা তেওঁলোকে মাটি সংগ্ৰহ কৰিবলৈ বাধ্য । এই মাটি সংগ্ৰহৰ বাবে ধন পৰিশোধ কৰিব লগা হয় । মাটিৰ বাচত-বৰ্তনবোৰ মহিলাসকলে আকাৰ দিয়াৰ পিচত বিশেষ ব্যৱস্থাৰ জৰিয়তে প্ৰাকৃতিক পদ্ধতিৰে জুই জ্বলাই ইয়াৰ আকৃতি পৰিশোধ কৰে । শেষত বহু কষ্টৰ মাজেৰে সেইসমূহ সামগ্ৰী বজাৰলৈ উলিয়াই দিয়ে । এনেদৰে এইসকল কুমাৰ সম্প্ৰদায়ৰ লোকে নিজৰ ঐতিহ্য ৰক্ষা কৰি আহিছে ।
- চৰকাৰৰ পৰা নাপাই সাহাৰ্য
আজোককাৰ দিনৰ পৰম্পৰা ৰক্ষাত মনোনিবেশ কৰা এগৰাকী মহিলাই কয়, "পুৱা এই মৃৎশিল্প লগত জড়িত হৈ পৰো ,কিন্তু এই শিল্প ৰক্ষাৰ বাবে ক’ৰবাত প্ৰত্যাহ্বানৰ সন্মুখীন হওঁ । চৰকাৰৰ পৰা কোনো প্ৰয়োজনীয় সা-সুবিধা নোপোৱাৰ বাবেই এনে হয় । লগতে ব্ৰহ্মপুত্ৰৰ দাঁতিত কুমাৰ মাটি পোৱা যায় যদিও গৰাখহনীয়াৰ বাবে এই মাটি সংগ্ৰহত চৰকাৰে বাধা আৰোপ কৰিছে । ফলত বিভিন্ন স্থানত মাটি কিনি সেয়া সংগ্ৰহ কৰিবলগীয়া হয় । সেয়েহে চৰকাৰে এই প্ৰাচীন শিল্পটোক জীয়াই ৰখাত আমাক সহায় কৰক ।"
