মাজুলী: মাজুলীবাসীৰ সন্মুখত আন এক সমস্যা । অস্বাভাৱিকভাৱে শুকাইছে ব্ৰহ্মপুত্ৰ । কমলাবাৰী-নিমাতী ঘাটৰ পাছত আফলামুখ-নিমাতী ঘাটৰ মাজত জাহাজ চলাচলত আহিছে সমস্যা । দৈনিক হ্ৰাস পাইছে ব্ৰহ্মপুত্ৰ নদীৰ জলস্তৰ ।
ব্ৰহ্মপুত্ৰ নদীত পানী হ্ৰাস পোৱাৰ বাবে নিমাতী ঘাটৰ পৰা আফলামুখ লৈ আহিলে অফলামুখত ফেৰী চপাবলৈ অসুবিধাত পৰিছে ফেৰীৰ চালকসকল । ইফালে নিমাতী ঘাটৰ সন্মুখত বালিচৰ হোৱাৰ ফলত জাহাজ চলাচলত অসুবিধাৰ সন্মুখীন হোৱা বুলি ব্যক্ত কৰে জাহাজচালকৰ লগতে আভ্যন্তৰীণ জল পৰিবহন বিভাগে ।
ইফালে ফেৰী চলাচল কৰা চেনেলসমূহত ব্ৰহ্মপুত্ৰৰ জলস্তৰৰ যি পৰিমাণ সেই অনুপাতে অধিক বোজা লৈ ফেৰী চলাচল কৰিব নোৱাৰি বুলি জানিবলৈ দিয়ে ফেৰী চালকসকলে । যাৰ ফলত আগন্তুক ৰাস পালনামত চাৰিচকীয়া আৰু দুচকীয়া বাহন জাহাজত যে সীমিত সংখ্যকহে পাৰ কৰিব পৰা হ'ব তাক অনুমান কৰিব পাৰি । অন্যহাতে আভ্যন্তৰীণ জল পৰিবহন বিভাগৰ কৰ্মচাৰীয়ে জানিবলৈ দিয়া অনুসৰি বৰ্তমান স্থানৰ পৰা অফলামুখ ঘাটতো জলস্তৰ হ্ৰাস পোৱাৰ বাবে দুই এদিনতে আন ঠাইলৈ স্থানান্তৰিত কৰাৰ কথা জানিবলৈ দিয়ে ।
আনহাতে কেইবাটাও দিন কমলাবাৰী নিমাতিৰ মাজত ফেৰী চলাচল বন্ধ থকাৰ পাছত পুনৰ ফেৰী সেৱা আৰম্ভ হৈছে যদিও কমলাবাৰী ঘাটত বৰ্তমানেও বন্ধ আছে চৰকাৰী জাহাজ চলাচল । এনে পৰিস্থিতিত চিন্তিত হৈ পৰিছে মাজুলীবাসীৰ লগতে মাজুলীলৈ সততে যাতায়ত কৰা ৰাইজ । উল্লেখ্য যে ৰাজ্য চৰকাৰৰ জল পৰিবহণ মন্ত্ৰী কেশৱ মহন্তয়ো পৰিস্থিতিৰ বুজ লৈ বিশেষ ড্ৰেজাৰৰ সহায়ত বালি খান্দি জলপথ মুকলি কৰাৰো পৰিকল্পনা কৰাৰ কথা উল্লেখ কৰিছিল । পিচে সেয়া কিমান ফলপ্ৰসু হ'ব সেয়া হ'ব সময়ত লক্ষ্যণীয় ।
| লগতে পঢ়ক: কিয় বন্ধ হ'ল কমলাবাৰী-নিমাতী পাৰঘাট ? |
