ধিং,৩ ছেপ্টেম্বৰ: আগৰ দিন নাই ৷ অৱসৰৰ লগে লগে শিক্ষকক অৱসৰকালীন সা-সুবিধা প্ৰদান কৰিব লাগিব বিভাগে । অৱসৰৰ লগে লগে পেন্সনৰ সা-সুবিধা প্ৰদান কাৰ্যসূচীৰ অংশ হিচাপে মৰিগাঁও জিলাত শিক্ষা বিভাগৰ দ্বাৰা যোৱা ৩১ আগষ্টত অৱসৰ গ্ৰহণ কৰা পাঁচগৰাকী শিক্ষক-শিক্ষয়িত্ৰীক মঙলবাৰে সম্বৰ্ধনা জনোৱাৰ লগতে অৱসৰকালীন সা-সুবিধা যেনে জমা-ছুটী বেতন, বীমা ধনৰ মঞ্জুৰী পত্ৰ আদি আনুষ্ঠানিকভাৱে প্ৰদান কৰা হয় ।
অনুষ্ঠানত মুখ্য অতিথিৰূপে উপস্থিত থকা মৰিগাঁও জিলা সাহিত্য সভাৰ সভাপতি মহেন্দ্ৰ শইকীয়াই এনে পদক্ষেপৰ বাবে শিক্ষা বিভাগক ভূয়সী প্ৰশংসা কৰাৰ লগতে অৱসৰী শিক্ষকসকলক সৃষ্টিমূলক আৰু গঠনমূলক কামত জড়িত হৈ থাকিবলৈ আহ্বান জনায় । তেওঁ বুনিয়াদী স্তৰত শিক্ষাৰ্থীৰ পঠন দক্ষতা বৃদ্ধিৰ বাবে মৰিগাঁৱৰ শিক্ষা বিভাগে লোৱা 'পঢ়াৰ আনন্দ' কাৰ্যসূচীৰ প্ৰসংগ উত্থাপন কৰি কয় যে এনে কাৰ্যসূচীয়ে ছাত্ৰ-ছাত্ৰীসকলৰ মহৎ উপকাৰ সাধন কৰাৰ উপৰিও ৰাজ্যখনত মাতৃভাষাৰ উত্তৰণতো সহায়ক হ'ব ।
মৰিগাঁও জিলাৰ বিদ্যালয়সমূহৰ পৰিদৰ্শক অপূৰ্ব ঠাকুৰীয়াই আঁত ধৰা অনুষ্ঠানটোত ধপাঁত বিৰোধী অভিযানত নিষ্ঠাৰে সেৱা আগবঢ়াই অহা এগৰাকী নিষ্ঠাবান বিষয়া ডাঃ জয়া বড়ো আৰু অসম উন্নতি সভাৰ সম্পাদক তথা সমাজকৰ্মী অতনু কুমাৰ শৰ্মা বিশিষ্ট অতিথি হিচাপে উপস্থিত থাকে ।
উল্লেখ্য যে মৰিগাঁও জিলাৰ বিদ্যালয়সমূহৰ পৰিদৰ্শকৰ উদ্যোগত লোৱা এই আশাশুধীয়া প্ৰচেষ্টাৰ প্ৰথম অনুষ্ঠানটো যোৱা এপ্ৰিল মাহত মৰিগাঁও জিলা আয়ুক্তৰ দ্বাৰা শুভাৰম্ভণি কৰা হৈছিল আৰু তেতিয়াৰ পৰা প্ৰতিমাহে অবিৰতভাৱে এই কাৰ্যসূচী অনুষ্ঠিত অহা হৈছে । অনুষ্ঠানত অৱসৰী শিক্ষকসকলৰ উপৰিও ভালেসংখ্যক শিক্ষক তথা শিক্ষা বিভাগৰ বিষয়া-কৰ্মচাৰী উপস্থিত থাকে ।
