নগাঁও,১৭ অক্টোবৰ : উপ-নিৰ্বাচন যিমানে চমু চাপি আহিছে সিমানেই চামগুৰি সমষ্টিৰ পৰিৱেশ উত্তাল হৈ পৰিছে । উপ-নিৰ্বাচনৰ দিন ঘোষণা হোৱাৰ পিছত মাত্ৰ দুটা দিনত নগাঁও জিলাৰ চামগুৰিত দুটাকৈ বিক্ষিপ্ত ঘটনা সংঘটিত হৈছে । যাৰ বাবে সমষ্টিটোৰ ৰাজনৈতিক পৰিৱেশ উত্তাল হৈ পৰিছে । মঙলবাৰে চামগুৰিত কংগ্ৰেছৰ এক ৰেলীত সংঘটিত আক্ৰমণৰ ঘটনাক কেন্দ্ৰ কৰি সৃষ্টি হোৱা উত্তেজনা অব্যাহত থকাৰ মাজতে পুনৰ চামগুৰিত সংঘটিত হয় আন এক ভয়ংকৰ ঘটনা ।
কংগ্ৰেছ-বিজেপিৰ সংঘাত
চামগুৰিৰ শিঙিমাৰীত কংগ্ৰেছৰ বিধায়কৰ বাহনৰ লগতে একাংশ কংগ্ৰেছ নেতাৰ বাহনত আক্ৰমণৰ চাঞ্চল্য মাৰ নৌযাওতেই বুধবাৰে নিশা চামগুৰি সমষ্টিৰ মাগুৰমাৰীত উপ-নিৰ্বাচনক কেন্দ্ৰ কৰিয়েই সংঘটিত হয় আন এক মাৰপিটৰ ঘটনা । বুধবাৰে সন্ধিয়া চামগুৰিৰ মাগুৰমাৰীত নিৰ্বাচনক কেন্দ্ৰ কৰি সংঘটিত এক মাৰপিটৰ ঘটনাত আহত হয় বিজেপিৰ সামাজিক মাধ্যমৰ দায়িত্বত থকা আশ্ৰাফুল আলম নামৰ এজন বিজেপি কৰ্মী ।
মাগুৰমাৰী অঞ্চলৰ কংগ্ৰেছ নেতা হজৰত আলীৰ নেতৃত্বত কংগ্ৰেছীৰ এটা দলে আশ্ৰাফুলক আক্ৰমণ কৰাৰ গুৰুতৰ অভিযোগ উত্থাপন কৰি কাৱৈমাৰী আৰক্ষী চকীত এজাহাৰ দাখিল কৰিছ বিজেপি নেতা-কৰ্মীয়ে । কিন্তু ইয়াৰ বিপৰীতে বিজেপি কৰ্মী আশ্ৰাফুলৰ নেতৃত্বত বিজেপি কৰ্মী সমৰ্থকৰ এটা দলে প্ৰথমে কংগ্ৰেছ নেতা হজৰত আলীৰ ঘৰত আক্ৰমণ কৰাৰ অভিযোগ উত্থাপন কৰে কংগ্ৰেছ নেতা হজৰত আলীয়ে । মঙলবাৰে শিঙিমাৰীত সংঘটিত সংঘাতৰ সময়ত কংগ্ৰেছৰ ৰেলীত হজৰত আলীয়েও অংশগ্ৰহণ কৰাৰ সন্দেহত তেওঁৰ বাসগৃহত আক্ৰমণ কৰা বুলিও দাবী কৰে কংগ্ৰেছ নেতাগৰাকীয়ে ।
আনহাতে, বিজেপি কৰ্মী আশ্ৰাফুলক আক্ৰমণ কৰাৰ প্ৰতিশোধত কংগ্ৰেছ নেতা হজৰত আলীৰ বাসগৃহত আক্ৰমণ কৰা বুলিও একাংশই সন্দেহ কৰিছে । এই ঘটনাক কেন্দ্ৰ কৰি বুধবাৰে নিশা উত্তাল হৈ পৰে সমগ্ৰ চামগুৰি সমষ্টি ।
ঘটনা সন্দৰ্ভত আৰক্ষী অধীক্ষকৰ প্ৰতিক্ৰিয়া
ঘটনা সংঘটিত হোৱাৰ পাছতে নিশাই চামগুৰিত উপস্থিত হৈ ঘটনাৰ তদন্ত আৰম্ভ কৰে নগাঁৱৰ আৰক্ষী অধীক্ষক স্বপ্ননীল ডেকাই । কংগ্ৰেছ নেতা হজৰত আলীৰ বাসগৃহৰ চিচি টিভিৰ ফুটেজ সংগ্ৰহ কৰি প্ৰাথমিক তদন্ত আৰম্ভ কৰাৰ কথা উল্লেখ কৰে আৰক্ষী অধীক্ষকগৰাকীয়ে ।
আনহাতে নিৰ্বাচনৰ নামত হিংসাত্মক কাৰ্যকলাপত জড়িতসকলৰ বিৰুদ্ধে আইনগত ব্যৱস্থা গ্ৰহণ কৰা হ'ব বুলি আৰক্ষী অধীক্ষকে অৱগত কৰে । লগতে ৰাজনৈতিক দলসমূহক এনে অপকৰ্মৰ আশ্ৰয় নল'বলৈও তেওঁ আহ্বান জনায় ।
