বঙাইগাঁও : সাংসদ ফণীভূষণ চৌধুৰীৰ পত্নী দিপ্তীময়ী চৌধুৰী হ'ব বঙাইগাঁৱৰ বিজেপি মিত্ৰজোঁটৰ উপ-নিৰ্বাচনৰ প্ৰাৰ্থী ৷ সকলো বিতৰ্ক আওকাণ কৰি বঙাইগাঁৱত বিজেপি মিত্ৰজোঁটৰ প্ৰাৰ্থী হিচাপে অসম গণ পৰিষদে আনুষ্ঠানিকভাৱে প্ৰাৰ্থিত্ব দিলে সাংসদ ফণীভূষণ চৌধুৰীৰ পত্নী দিপ্তীময়ী চৌধুৰীক । বিতৰ্কৰ মাজতেই অগপৰ নেতৃত্বই ঘোষণা কৰিলে এই কথা ।
এক প্ৰেছ বিজ্ঞপ্তিযোগে অসম গণ পৰিষদ দলৰ সাধাৰণ সম্পাদক কমলা কলিতাই জনাই, "অসম গণ পৰিষদ দলৰ সভাপতি অতুল বৰাদেৱে বঙাইগাঁও বিধানসভা সমষ্টিৰ উপ-নিৰ্বাচনৰ বাবে নিম্নলিখিত সদস্যগৰাকীক দলীয় প্রার্থী হিচাপে মনোনীত কৰাৰ প্ৰস্তাৱত অনুমোদন জনাইছে ।"
প্ৰাৰ্থিত্বকেন্দ্ৰিক সংঘাত
এতিয়া সকলো বিতৰ্কৰ পিছত ৩২ নং বঙাইগাঁও বিধানসভা সমষ্টিৰ বিজেপি মিত্ৰজোঁটৰ প্ৰাৰ্থী হ'ব অগপৰ দিপ্তীময়ী চৌধুৰী ৷ ইয়াৰ লগে লগে বঙাইগাঁৱৰ উপ-নিৰ্বাচনৰ মূল যুদ্ধখন কংগ্ৰেছৰ ব্ৰজেনজিৎ সিংহ আৰু অগপৰ দিপ্তীময়ী চৌধুৰীৰ মাজতেই যে আৱদ্ধ থাকিব সেয়া নিশ্চিত হৈ পৰিল ৷
১৩ নৱেম্বৰত হ'বলগীযা অসমৰ বিধানসভাৰ উপ-নিৰ্বাচনৰ বাবে বিজেপিয়ে নিজে প্ৰাৰ্থিত্ব আগবঢ়াবলগীয়া ৩ সমষ্টিত প্ৰাৰ্থী ঘোষণা কৰাৰ পিছতো মিত্ৰদল অগপই দলীয় সংকটৰ কাৰণে বঙাইগাঁৱত প্ৰাৰ্থিত্ব ঘোষণা কৰিব পৰা নাছিল । ফণীভূষণ চৌধুৰীৰ পত্নী দিপ্তীময়ী চৌধুৰীক সমষ্টিটোৰ প্ৰাৰ্থিত্ব দিয়াটো প্ৰায় স্পষ্ট হোৱাৰ পাছত বঙাইগাঁও সমষ্টিত অগপত সংঘাত আৰম্ভ হয় ।
আনকি প্ৰাৰ্থী ঘোষণাৰ পূৰ্বেই বঙাইগাঁও জিলা অগপৰ সভাপতি-সম্পাদকে দলত্যাগ কৰে ৷ সভাপতি বিজয় সিংহ আৰু সম্পাদক শৈৰেন্দ্ৰ সৰকাৰৰ দলত্যাগৰ পিছতেই সংকটত পৰে অগপ নেতৃত্ব । এতিয়া লক্ষণীয় হ'ব যে ফণীভূষণ চৌধুৰীয়ে বিগত চাৰিটা দশক নিজৰ দখলত ৰখা বঙাইগাঁও সমষ্টিটোত পত্নী দিপ্তীময়ী চৌধুৰীক কিদৰে দলীয় সংকট আঁতৰাই জয়ী কৰাই অগপৰ পতাকাৰ বিজয় যাত্ৰা এইবাৰো অক্ষুণ্ণ ৰাখে ।
