গুৱাহাটী, ১৪ ছেপ্টেম্বৰ : পুনৰ বিনা প্ৰতিদ্বন্দ্বিতাৰে অসম অলিম্পিক সন্থাৰ সভাপতি পদত কেন্দ্ৰীয় মন্ত্ৰী সৰ্বানন্দ সোণোৱাল । অসম অলিম্পিক সন্থাৰ বিগত নিৰ্বাচনতো বিনাপ্ৰতিদ্বন্দ্বিতাৰে জয়ী হৈছিল কেন্দ্ৰীয় মন্ত্ৰীগৰাকী । তেতিয়া তেওঁ মুখ্যমন্ত্ৰী আছিল । এইবাৰ কেন্দ্ৰীয় মন্ত্ৰী হিচাপে তেওঁ অসম অলিম্পিক সন্থাৰ সভাপতিৰ দায়িত্ব বহন কৰিব ।
অহা ২২ ছেপ্টেম্বৰত ডিব্ৰুগড়ত অসম অলিম্পিক সন্থাৰ নিৰ্বাচন অনুষ্ঠিত হ’ব । ইতিমধ্যে বৃহস্পতিবাৰে মনোনয়ন পত্ৰ প্ৰত্যাহাৰৰ অন্তিম দিনা বহুকেইগৰাকী প্ৰাৰ্থীয়ে নিজৰ মনোনয়ন পত্ৰ প্ৰত্যাহাৰ কৰাত অসম অলিম্পিক সন্থাৰ বহুকেইটা শীৰ্ষ পদত কেবাগৰাকীও প্ৰাৰ্থী বিনাপ্ৰতিদ্বন্দ্বিতাৰে জয়ী হৈছে । সেই অনুসৰি বিনাপ্ৰতিদ্বন্দ্বিতাৰে সভাপতি পদত জয়ী হৈছে কেন্দ্ৰীয় মন্ত্ৰী সৰ্বানন্দ সোণোৱাল ।
২২ ছেপ্টেম্বৰত ডিব্ৰুগড়ত অসম অলিম্পিক সন্থাৰ ২০২৪-২৮ বৰ্ষৰ বাৰ্ষিক সাধাৰণ সভা আৰু নিৰ্বাচন অনুষ্ঠিত হ'ব । ইতিমধ্যে অসম অলিম্পিক সন্থাৰ নিৰ্বাচন আয়োগে প্ৰকাশ কৰিলে চূড়ান্ত প্ৰাৰ্থী তালিকা । সেই অনুসৰি অসম অলিম্পিক সন্থাৰ সাধাৰণ সম্পাদক, কোষাধ্যক্ষ, যুটীয়া সম্পাদক আৰু কাৰ্যনিৰ্বাহক পদৰ বাবে নিৰ্বাচন অনুষ্ঠিত হ’ব । বৰ্তমানৰ অসম অলিম্পিক সন্থাৰ সাধাৰণ সম্পাদক লক্ষ্য কোঁৱৰে সংবাদ মাধ্যমৰ আগত এই কথা সদৰী কৰে ।
ইফালে অসম অলিম্পিক সন্থাৰ সভাপতি পদৰ উপৰি সহকাৰী সম্পাদকৰ পদত আঠগৰাকীকৈ প্ৰাৰ্থী বিনাপ্ৰতিদ্বন্দ্বিতাৰে নিৰ্বাচিত হৈছে । ইফালে জ্যেষ্ঠ উপ-সভাপতি পদৰ বাবে প্ৰাৰ্থিত্ব আগবঢ়োৱা সকলো প্ৰাৰ্থীয়ে মনোনয়ন প্ৰত্যাহাৰ কৰিছে । যাৰ ফলত এই পদৰ বাবে মন্ত্ৰী পীযুষ হাজৰীকা, জয়ন্ত মল্লবৰুৱা আৰু নন্দিতা গাৰ্লোছা মনোনীত হৈছে । আনহাতে সাধাৰণ সম্পাদকৰ পদত লক্ষ্য কোঁৱৰৰ বিপৰীতে আছে কেবাগৰাকীও প্ৰাৰ্থী । ৰাজনৈতিক হেঁচাৰ পিছতো কেবাজনো প্ৰাৰ্থীয়ে নিজৰ মনোনয়ন প্ৰত্যাহাৰ নকৰাৰ বাবেই নিৰ্বাচন অনুষ্ঠিত হোৱাটো নিশ্চিত হৈছে ।
লক্ষ্যণীয় বিষয় যে ক্ৰীড়াৰ ক্ষেত্ৰখনত ৰাজনৈতিক প্ৰভাৱ থকাৰ কথাটো নতুন নহয় । বিশেষকৈ ক্ৰীড়া সংগঠনসমূহ ৰাজনৈতিক প্ৰভাৱৰ পৰা মুক্ত নহয় । সেই কথাই পুনৰ প্ৰতিপন্ন হ'ল অসম অলিম্পিক সন্থাত । কাৰণ অসম অলিম্পিক সন্থাৰ পৰৱৰ্তী কাৰ্যনিৰ্বাহক কমিটীখনৰ গুৰুত্বপূৰ্ণ বহুকেইটা পদত প্ৰতিদ্বন্দ্বিতা অবিহনে ৰাজনৈতিকভাৱে মনোনীত হোৱাটো নিশ্চিত হৈছে । এককথাত ৰাজনৈতিক প্ৰভাৱৰ মাজেৰেই গঠন হ'ব অসম অলিম্পিক সন্থাৰ পৰৱৰ্তী কাৰ্যনিৰ্বাহক কমিটী ।
নতুন কাৰ্যনিৰ্বাহক কমিটীখনত ক্ৰীড়াক্ষেত্ৰৰ সৈতে প্ৰত্যক্ষভাৱে জড়িত ব্যক্তিৰ বিপৰীতে সকলো শীৰ্ষপদত শাসনাধিষ্ঠিত বিজেপিৰ নেতা অধিষ্ঠিত হোৱাটো নিশ্চিত । ইতিমধ্যে অসম অলিম্পিক সন্থাৰ জ্যেষ্ঠ উপ-সভাপতি হিচাপে প্ৰৱেশ ঘটিছে দুই ক্ষমতাশালী মন্ত্ৰী পীযুষ হাজৰীকা আৰু জয়ন্ত মল্লবৰুৱাৰ ।
উল্লেখ্য যে সভাপতি পদত প্ৰতিদ্বন্দ্বিতা কৰাৰ কথা আছিল মুখ্যমন্ত্ৰী হিমন্ত বিশ্ব শৰ্মাই । পৰম্পৰাগতভাৱে দেখা যায় যে ৰাজ্যৰ মুখ্যমন্ত্ৰীজনেই সাধাৰণতে অসম অলিম্পিক সন্থাৰ সভাপতি হৈ আহিছে । কিন্তু সোণোৱালৰ আৰু এটা কাৰ্যকালৰ প্ৰতি থকা প্ৰৱল ইচ্ছা আৰু শীৰ্ষ নেতৃত্বৰ আশীৰ্বাদৰ বাবে হিমন্ত বিশ্ব শৰ্মা মুখ্যমন্ত্ৰী হৈয়ো থমকি ৰ'ল । অহা ২২ ছেপ্টেম্বৰত ডিব্ৰুগড়ত হ’বলগীয়া অলিম্পিক সন্থাৰ সাধাৰণ সভাত নতুন কমিটীখন ঘোষণা কৰা হ’ব ৷
লগতে পঢ়ক : পদক আনিব নোৱাৰিলেও লাভলীনাৰ প্ৰদৰ্শনত সুখী পিতৃ টিকেন বৰগোঁহাই
আন্তঃৰাষ্ট্ৰীয় প্ৰতিযোগিতাত ভাৰতীয় ফুটবল দলৰ হৈ জিলিকিল ডিব্ৰুগড়ৰ তৰালী মিলি
ফাইনেলত উপনীত হোৱাৰ পিছতে বিনেশ ফোগাটক উচ্চ প্ৰশংসা ৰাহুল গান্ধীৰ
