স্পৰ্টছ ডেস্ক,২৩ জুন : ইউৰো ২০২৪ত পৰ্তুগালে তুৰ্কীক ৩-০ গ'লত পৰাস্ত কৰে । পৰ্তুগালে সমগ্ৰ খেলখনত আধিপত্য বিস্তাৰ কৰা দেখা গৈছিল । অৱশ্যে খেলখন চলি থকা সময়ত ষ্টেডিয়ামত থকা বেছিসংখ্যক দৰ্শকৰে দৃষ্টি নিবদ্ধ আছিল পৰ্তুগালৰ তাৰকা ফুটবলাৰ ক্ৰিষ্টিয়ানো ৰোণাল্ডোৰ ওপৰত । কিয়নো ইজনৰ পিচত সিজন অনুৰাগী খেলপথাৰলৈ আহি তাৰকাগৰাকীৰ সৈতে ছেলফি তোলাৰ প্ৰয়াস কৰিছিল । নিৰাপত্তা ভংগ কৰি এনেদৰে অনুৰাগীৰ খেলপথাৰত প্ৰৱেশৰ বিষয়টোৱে এতিয়া ব্যাপক চৰ্চা লাভ কৰিছিল । নিৰাপত্তা ব্যৱস্থাৰ ওপৰত প্ৰশ্নও উত্থাপন হৈছে । এখন খেলত একাধিকবাৰ নিৰাপত্তা ভংগৰ বিষয়টোৱে তীব্ৰ প্ৰতিক্ৰিয়াৰো সৃষ্টি কৰিছে । এনে পৰিস্থিতিত ৰোণাল্ডোৰ লগতে বাকী খেলুৱৈসকলো উদ্বিগ্ন হোৱা দেখা গৈছে ।
খেলখনত পৰ্তুগাল ৩-০ ত আগবাঢ়ি আছিল আৰু তেতিয়া প্ৰথমগৰাকী অনুৰাগীয়ে ক্ৰিষ্টিয়ানো ৰোণোল্ডোৰ সৈতে ছেলফি ল'বলৈ খেলপথাৰত প্ৰৱেশ কৰিছিল । পৰ্তুগীজ তাৰকাজনে অনুৰাগীজনৰ সৈতে এখন ছেলফি লৈছিল । তাৰ পিচতে নিৰাপত্তাৰক্ষী বা ষ্টিৱাৰ্ডে আটক কৰাৰ পূৰ্বে তেওঁ দৌৰি গৈছিল । প্ৰথম অনুৰাগীজন সফল হোৱাৰ পিচত কেইমিনিটমানৰ পিচকে আন এজন অনুৰাগীয়ে ভাগ্য পৰীক্ষাৰ বাবে খেলপথাৰত প্ৰৱেশ কৰে । এনে পৰিস্থিতিত খেলখন ১০ ছেকেণ্ডৰ বাবে বন্ধ কৰিবলগীয়া হয় । যাৰ বাবে ৰোণাল্ডোক বিচলিত দেখা গৈছিল । কিয়নো ৰোণাল্ডোৱে বলপূৰ্বকভাৱে লোকজনৰ হাত তেওঁৰ ডিঙিৰ পৰা আঁতৰাব লগা হৈছিল । লগে লগে নিৰাপত্তাৰক্ষীয়ে অনুৰাগীজনক খেলপথাৰৰ পৰা আঁতৰাই লৈ যায় ।
ইফালে ৯৩ মিনিটত আৰু দুজন অনুৰাগী খেলপথাৰত প্ৰৱেশ কৰে আৰু পিচত খেল শেষ হোৱাৰ লগে লগে আৰু কেইজনমান খেলপথাৰলৈ দৌৰি যায় আৰু ৰোণাল্ডোৰ সৈতে ছেলফি তোলাৰ প্ৰয়াস কৰে । একাধিক এনে ঘটনাৰ পিচত দুয়োপক্ষৰ খেলুৱৈসকলক বিৰক্ত হোৱা দেখা যায় ।
