নগাঁও : আজি ৰাজ্যৰ পাঁচটা সমষ্টিত অনুষ্ঠিত হোৱা উপ-নিৰ্বাচনৰ ভোটগণনা । পুৱা 8 বজাৰ পৰা আৰম্ভ হৈছে পাঁচটা সমষ্টিৰ উপ-নিৰ্বাচনৰ ভোটগণনা । আজি নিৰ্ণয় হ'ব পাঁচটা সমষ্টিত অৱতীৰ্ণ হোৱা 34 গৰাকী প্ৰাৰ্থীৰ ভাগ্য । এই 34 গৰাকী প্ৰাৰ্থীৰ মাজৰ পৰা জয়ী হৈ কোন পাঁচগৰাকী দিছপুৰলৈ আহিব সেয়া আজি নিৰ্ণয় হ'ব ।
বিয়লিৰ পূৰ্বেই হয়তো অন্ত পৰিব উপ-নিৰ্বাচনক লৈ কৰা সকলো অপেক্ষা । নগাঁও জিলা আয়ুক্ত কাৰ্যালয়ত আৰম্ভ হৈছে ভোটগণনা । পুৱা 8 বজাৰ লগে লগে পোষ্টেল বেলটৰ গণনা আৰম্ভ কৰা হৈছে । মুঠ 267 খন পোষ্টেল বেলট ইছ্যু কৰা হৈছিল যদিও এই পৰ্যন্ত কিমান পোষ্টেল বেলটত ভোটদান হৈছে এই তথ্য এই পৰ্যন্ত সদৰী কৰা নাই ।
চামগুৰি বিধানসভা সমষ্টিৰ উপ নিৰ্বাচনত মুঠ 11 গৰাকীকৈ প্ৰাৰ্থী অৱতীৰ্ণ হৈছে যদিও বিজেপি আৰু কংগ্ৰেছৰ মাজতেই মূল প্ৰতিদ্বন্দ্বিতা হোৱাটো এক প্ৰকাৰ নিশ্চিত । অৱশ্যে কিছু সময় পাছতেই স্পষ্ট হ'ব সমষ্টিটোৰ পৰা কোনে মাৰিব শেষ হাঁহি ।
সমষ্টিটোৰ মুঠ 1 লাখ 80 হাজাৰ ভোটাৰৰ এক লাখ 42 হাজাৰ গৰাকী ভোটাৰে ভোটদান কৰিছে চামগুৰি সমষ্টিৰ উপ নিৰ্বাচনত । ভোটগণনাৰ আৰম্ভণিতেই বিজেপিৰ প্ৰাৰ্থী জয়ী হোৱাটো নিশ্চিত বুলি আশাবাদী বিজেপি নেতা সুৰেশ বৰা ।
উপনিৰ্বাচনত চামগুৰিত ভোটদানৰ হাৰ আছিল ৭৯.৫৫ শতাংশ । এইবাৰ পাঁচ সমষ্টিৰ ভিতৰত অতি আকৰ্ষণীয় ভোট যুঁজ হৈছে চামগুৰি সমষ্টিত । আনহাতে বিশেষভাৱে চৰ্চাত আছিল চামগুৰি । চামগুৰিত মূল ভোট যুঁজ হ’ব বিজেপিৰ প্ৰাৰ্থী দিপ্লু ৰঞ্জন শৰ্মা আৰু কংগ্ৰেছ প্ৰাৰ্থী তানজিল হুছেইনৰ মাজত হ'ব বুলি ধাৰণা কৰা হৈছে ।
সমষ্টিটোত অৱতীৰ্ণ হৈছিল ১১ গৰাকী প্ৰাৰ্থী । তেওঁলোক হৈছে -
- বিজেপিৰ প্ৰাৰ্থী দিপ্লুৰঞ্জন শৰ্মা
- কংগ্ৰেছৰ প্ৰাৰ্থী তানজিল হুছেইন
- আম আদমি পাৰ্টীৰ প্ৰাৰ্থী নুৰুল আমিন চৌধুৰী
- এছ ইউ চি আইৰ প্ৰাৰ্থী আব্দুছ চবুৰ মিঞা
- ভাৰতীয় গণ পৰিষদৰ প্ৰাৰ্থী বীৰেন বসাক
- ৰাষ্ট্ৰীয় উলেমা কাউন্সিলৰ প্ৰাৰ্থী ৰবুল হক
- নিৰ্দলীয় প্ৰাৰ্থী ফাতেমা খাতুন
- নিৰ্দলীয় প্ৰাৰ্থী শশী তাঁতী
- নিৰ্দলীয় প্ৰাৰ্থী জেহিৰুল ইছলাম
- নিৰ্দলীয় প্ৰাৰ্থী মুচাব্বিৰ আলি আহমেদ আৰু
- নিৰ্দলীয় প্ৰাৰ্থী আব্দুল মাজিদ
