নিউজ ডেস্ক, ৩ জুন: মঙলবাৰে দেশৰ ১৮ সংখ্যক লোকসভা নিৰ্বাচনৰ ভোটগণনাৰ ফলাফলৰ বাবে সাজু হৈছে কংগ্ৰেছ দল ৷ লোকসভা নিৰ্বাচনৰ বহু প্ৰত্যাশিত ভোট গণনাৰ তদাৰক কৰিবলৈ এটা নিৰীক্ষণ কেন্দ্ৰ স্থাপন কৰিছে দেশৰ আটাইতকৈ পুৰণি দলটোৱে । ‘‘গণনা দিৱসৰ বাবে আমি সকলো প্ৰয়োজনীয় ব্যৱস্থা কৰিছো । বিজেপি চৰকাৰে যিকোনো ধৰণৰ চক্ৰান্ত কৰিব পাৰে । বিগত সময়ত তেওঁলোকে বিভিন্ন সাংবিধানিক প্ৰতিষ্ঠানক প্ৰভাৱিত কৰি আহিছে । যদিও আমি ভাৰতৰ নিৰ্বাচন আয়োগক বিশ্বাস কৰো, তথাপিও আমি সজাগ হোৱাটো প্ৰয়োজন ।’’ কংগ্ৰেছৰ সভাপতি মল্লিকাৰ্জুন খাৰ্গেৰ কাৰ্যালয় পৰিচালনা কৰা চৈয়দ নাছিৰ হুছেইনে ই টিভি ভাৰতক এইদৰে কয় ।
‘‘ইণ্ডিয়া ব্লকে ১ জুনত বৈঠকত মিলিত হৈ নিৰ্বাচনৰ মূল্যায়ন কৰিছিল । তাৰ পিচত কংগ্ৰেছৰ অধ্যক্ষই ২৯৫+ আসনৰ যুক্তিসংগত সংখ্যা ঘোষণা কৰে । আমি আমাৰ জয়ৰ ওপৰত আত্মবিশ্বাসী ।’’ তেওঁ কয় ৷
এ আই চি চিৰ বিষয়ববীয়াগৰাকীৰ মতামত অনুসৰি দলৰ প্ৰাক্তন মুৰব্বী ছোনিয়া গান্ধীয়ে পুৱা যি আত্মবিশ্বাস প্ৰকাশ কৰিছিল, সেই আত্মবিশ্বাসে প্ৰতিফলিত কৰিছে যে প্ৰকৃত নিৰ্বাচনৰ ফলাফল এন ডি এৰ জয়ৰ ভৱিষ্যদ্বাণী কৰা এগজিট প’লৰ বিপৰীত হ’ব ।
দলৰ এগৰাকী সদস্যৰ মতে, কংগ্ৰেছে নিজৰ সকলো ৰাজ্যিক ইউনিটক গোটেই গণনাৰ দিনটো সজাগ হৈ থাকিবলৈ কোৱাৰ লগতে কোনো স্থানৰ পৰা কিবা অন্যায়ৰ খবৰ আহিলে দলীয় কৰ্মীক ক্ষিপ্ৰতাৰে নিয়োগ কৰিবলৈ নিৰ্দেশ দিছে । তদুপৰি দলৰ কর্মীসকলক সমগ্র প্রক্রিয়া সম্পূর্ণ নোহোৱা পর্যন্ত গণনাকক্ষৰ পৰা ওলাই নাযাবলৈ কোৱাৰ লগতে কোনো সন্দেহজনক কার্যকলাপৰ ভিডিঅ’ মোবাইল ফোনত ৰেকৰ্ড কৰি সেয়া ৰাষ্ট্রীয় নিৰীক্ষণ কেন্দ্রলৈ প্রেৰণ কৰিবলৈ আহ্বান জনায় ৷
লোকসভা নিৰ্বাচনৰ অধিক বাতৰিৰ বাবে ক্লিক কৰক- https://www.etvbharat.com/as/!elections/election-2024
লগতে পঢ়ক: এগজিট প’লে যিয়েই নকওক ফলাফল ভাল হ’ব বুলি আশাবাদী ভূপেন বৰা - Lok Sabha Election 2024 results
দলটোৱে অধিবক্তাৰ এটা গোটো গঠন কৰিছে, যিয়ে সমাধান আগবঢ়াব আৰু গণনা প্ৰক্ৰিয়াৰ সময়ত ৰিপ’ৰ্ট কৰা যিকোনো ভুলৰ সৈতে মোকাবিলা কৰাত কৰ্মীসকলক সহায় কৰিব । হুছেইনে কয়, ‘‘কিছুমান স্পষ্ট আসন আৰু কিছুমান বন্ধ আসন আছে য’ত আইনী সহায়ৰ প্ৰয়োজন হ’ব পাৰে ।’’
ভোটদানৰ সাতটা পৰ্যায়ত বিজেপি নেতাসকলে বাৰে বাৰে নিৰ্বাচনী আচৰণ বিধি উলংঘা কৰাৰ লগতে সংবিধান সলনি কৰাৰ অভিপ্ৰায়ো ৰাজহুৱা কৰাৰ বাবে এই সাৱধানতা অৱলম্বন কৰা হৈছিল বুলি এগৰাকী দলীয় নেতাই কয় ।
‘‘বিজেপিৰ এই নৈতিকভাৱে দুৰ্নীতিগ্ৰস্ত আচৰণৰ বাবেই ভোটগণনাৰ সময়ত আমি সজাগ হোৱাটো প্ৰয়োজন । আমি প্ৰতিজন কৰ্মীক গণতন্ত্ৰ ৰক্ষাৰ বাবে ঘৰৰ পৰা ওলাই আহিবলৈ আহ্বান জনাইছো । টিভিত ফলাফল চোৱাৰ পৰিৱৰ্তে কৰ্মীসকলে দলৰ জিলা আৰু ৰাজ্যিক মুখ্য কাৰ্যালয়ত উপস্থিত হৈ দলটোক আমাৰ ভোট সুৰক্ষিত কৰাত সহায় কৰিব লাগে ।’’ ৰাজ্যিক ইউনিটসমূহলৈ প্ৰেৰণ কৰা এ আই চি চিৰ এক বাৰ্তাত এইদৰে কোৱা হৈছে ।
“কৰ্মীসকলে ভোটাৰৰ সৈতে অহৰহ যোগাযোগত থাকিব লাগে আৰু গণনা প্ৰক্ৰিয়াত যিকোনো অমিল হ’লে গণনা কেন্দ্ৰৰ নাম আৰু সংশ্লিষ্ট সংসদীয় সমষ্টিৰ নাম নিৰ্দিষ্ট হেল্পলাইন নম্বৰত ৰিপৰ্ট কৰিব লাগে যাতে প্ৰয়োজনীয় ব্যৱস্থা গ্ৰহণ কৰিব পাৰে,” বাৰ্তাটোত কোৱা হৈছে ।
নিৰীক্ষণ ব্যৱস্থাৰ উপৰিও কংগ্ৰেছে বৃহৎ সংখ্যক জ্যেষ্ঠ নেতা আৰু সংবাদ মাধ্যমৰ দলক আতিথ্য দিয়াৰ বিশদ ব্যৱস্থাও কৰিছিল, যিসকলে মঙলবাৰে এ আই চি চিৰ মুখ্য কাৰ্যালয়ত একত্ৰিত হ’ব ।
‘‘আমি কৰ্মীসকলক সকলো গণনাকেন্দ্ৰত সতৰ্কতা অৱলম্বন কৰিবলৈ নিৰ্দেশ দিছো । যিকোনো সমস্যাৰ সৈতে মোকাবিলা কৰিবলৈ তেওঁলোক সাজু হৈছে । ইণ্ডিয়া ব্লকে জয়লাভ কৰিবলৈ গৈ আছে । কংগ্ৰেছ প্ৰধান বিৰোধী দল আৰু ইয়াৰ ভূমিকা পালন কৰিব লাগিব ।’’ ই টিভি ভাৰতক এইদৰে কয় দিল্লী কংগ্ৰেছৰ মুৰব্বী দেৱেন্দ্ৰ যাদৱে ।
লগতে পঢ়ক: কংগ্ৰেছে চিন্তা কৰে আৰু আমি চৰকাৰ গঠন কৰো: পীযুষ হাজৰীকা - Lok Sabha Election 2024
