তেজপুৰ, ৯ আগষ্ট: কংগ্ৰেছত যোগ দিলে প্ৰাক্তন বিজেপি বিধায়ক অশোক শৰ্মাই ৷ কংগ্ৰেছত যোগ দিয়াৰ পূৰ্বেই মুখ্যমন্ত্ৰীৰ বিৰুদ্ধে অশোক শৰ্মাই কৰা মন্তব্যক লৈ প্ৰতিক্ৰিয়া প্ৰকাশ কৰিছে বিজেপি দলৰ ৰাজ্যিক মুখপাত্ৰ কিশোৰ উপাধ্যায়ে ৷ ‘‘অশোক শৰ্মাই কংগ্ৰেছত যোগদান কৰাৰ পূৰ্বেই যে কংগ্ৰেছৰ দীক্ষা লৈছে সেয়া প্ৰমাণিত হৈছে । অশোকদা এজন বহু সন্মানীয় ব্যক্তি আৰু বিজেপিৰ জ্যেষ্ঠ নেতা ৷ তেওঁ বিজেপি দল ত্যাগ কৰাৰ পাছতে এই ধৰণৰ কথা কোৱাটো শোভা নাপায় ৷’’ এই মন্তব্য বিজেপিৰ ৰাজ্যিক মুখপাত্ৰ কিশোৰ উপাধ্যায়ৰ ।
কংগ্ৰেছত যোগদান কৰাৰ আগে আগে বিজেপিৰ প্ৰাক্তন জ্যেষ্ঠ নেতাজনে মুখ্যমন্ত্ৰী হিমন্ত বিশ্ব শৰ্মাৰ নেতৃত্বত চলা বিজেপিৰ কাৰুকাৰ্যৰ বাবে এদিন বাংলাদেশৰ দৰে অসমৰ পৰিস্থিতি হ’ব বুলি মন্তব্য কৰিছিল ।
অশোক শৰ্মাই কি কৈছিল:
বিজেপিৰ প্ৰাক্তন জ্যেষ্ঠ নেতা আৰু সংঘ পৰিয়ালৰ পৰা আঁতৰি শুকুৰবাৰে কংগ্ৰেছ দলত যোগদান কৰা অশোক শৰ্মাই বৃহস্পতিবাৰে নলবাৰীত মুখ্যমন্ত্ৰী হিমন্ত বিশ্ব শৰ্মাক উদ্দেশ্যি কেতবোৰ মন্তব্য কৰিছিল ৷ তেওঁ কৈছিল, ‘‘মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বত অসমত বিজেপিৰ যি ৰাজনীতি আৰম্ভ হৈছে, তাৰ বাবে পৰৱৰ্তী সময়ত অসমত বাংলাদেশৰ বৰ্তমানৰ দৰে পৰিস্থিতি হ’ব ৷’’ ইয়াৰ প্ৰত্যুত্তৰত বিজেপিৰ ৰাজ্যিক মুখপাত্ৰ কিশোৰ উপাধ্যায়ে ই টিভি ভাৰতক এক আছুতীয়া সাক্ষাৎকাৰত কয়, ‘‘তেওঁ পৰোক্ষভাৱে ভাবুকি দিছে যে অসমৰ ৪০ শতাংশ মিঞা মুছলমান লোকে বাংলাদেশৰ দৰে মুখ্যমন্ত্ৰী ড৹ শৰ্মাক আক্ৰমণ কৰিব ।’’
কিশোৰ উপাধ্যায়ৰ প্ৰতিক্ৰিয়া:
উপাধ্যায়ে কয়, ‘‘বিজেপি এৰাৰ লগে লগেই তেওঁ হিন্দুসকলক আক্ৰমণ কৰাৰ যি ভাবুকি দিছে সেয়া আমি অত্যন্ত দুখ পাইছো । বাংলাদেশত মিঞাই হিন্দুক আক্ৰমণ কৰিছে সেয়া হ’ব পাৰে ৷ সেই ভাবুকি অশোক শৰ্মাৰ দৰে সংঘৰ প্ৰাক্তন ব্যক্তিয়ে কৰাটো দুখজনক ৷ কিন্তু ইয়াত মিঞাই হিন্দুক আক্ৰমণ কৰাৰ কথা কেতিয়াও হ’ব নোৱাৰে ৷ যেতিয়ালৈকে হিমন্ত বিশ্ব শৰ্মা থাকিব তেতিয়ালৈকে ই সম্ভৱ নহয় ।’’ তেওঁ লগতে কয়, ‘‘বাংলাদেশত এচাম ধৰ্মীয় মৌলবাদীয়ে মৌলবাদ চলাবলৈ এনে কাম কৰিছে আৰু তাকে লৈ অশোক শৰ্মাই ভাবুকি দিছে ।’’
নতুন বাংলাদেশীৰ অনুপ্ৰৱেশ নঘটে অসমত:
বিজেপিৰ ৰাজ্যিক মুখপাত্ৰ কিশোৰ উপাধ্যায়ে কয়, ‘‘বাংলাদেশৰ আন্দোলনৰ যি চৰিত্ৰ, তাত ISI সমৰ্থিত মানুহ আছে বুলি বহুতে কয়, কিন্তু আমি নাজানো ৷ তাত থকা ইস্ক'ন মন্দিৰ ভাঙি পেলোৱা হৈছে, শ্বেখ মজিবুৰ ৰহমানৰ প্ৰতিমূৰ্তি ভাঙি পেলোৱা হৈছে । যি ইস্ক'ন মন্দিৰত ১৯৭১ চনত ছয় মাহ দৈনিক ২ লাখ বাংলাদেশী মানুহক খাদ্য যোগান ধৰা হৈছিল, সেই মন্দিৰকেই ভাঙি দিয়া হৈছে ৷ গতিকে তাত মৌলবাদীৰ উত্থান হৈছে । বাংলাদেশৰ পৰা এতিয়া কোনো ধৰণৰ নতুন লোকে অসমত প্ৰৱেশ কৰিব নোৱাৰে ৷ সেয়া মুখ্যমন্ত্ৰীয়ে স্পষ্ট কৰি দিছে ।"
