হায়দৰাবাদ: শ্ৰমিকৰ সামাজিক সুৰক্ষা বৃদ্ধিৰ লক্ষ্যৰে কেন্দ্ৰীয় চৰকাৰে ১৯৭৬ চনত কৰ্মচাৰী জমা সংযুক্ত বীমা আঁচনি(Employees Deposit Linked Insurance Scheme চমুকৈ EDLI) আৰম্ভ কৰিছিল । কৰ্মচাৰী ভৱিষ্য নিধি সংস্থা (ই পি এফ অ’)ই এই আঁচনিৰ তদাৰক কৰিব । এই পদক্ষেপৰ লক্ষ্য হৈছে ব্যক্তিগত খণ্ডত কাম কৰা তথা ই পি এফ অ’ৰ সদস্য কৰ্মচাৰীসকলক জীৱন বীমাৰ সুবিধা প্ৰদান কৰা ।
ই ডি এল আই আঁচনি
এই আঁচনিখন প্ৰতিষ্ঠিত নিয়ম অনুসৰি ই পি এফ অ’ৰ শ্বেয়াৰহোল্ডাৰ কৰ্মচাৰীসকলৰ বাবে কোনো খৰচ নোহোৱাকৈ ৰূপায়ণ কৰা হয় । লগতে কৰ্মচাৰী ভৱিষ্য পুঁজি আৰু বিবিধ বিধান আইন, ১৯৫২ৰ অধীনত পঞ্জীয়নভুক্ত সকলো প্ৰতিষ্ঠানৰ ক্ষেত্ৰতো ই প্ৰযোজ্য । ইয়াত ১৫ হাজাৰ টকা পৰ্যন্ত দৰমহা পোৱা কৰ্মচাৰী স্বয়ংক্ৰিয়ভাৱে এই আঁচনিখনত অন্তৰ্ভূক্ত হয় ।
উল্লেখযোগ্য যে নিয়োগকৰ্তাই কৰ্মচাৰীজনৰ মাহিলী দৰমহাৰ ০.৫ শতাংশ ই ডি এল আই আঁচনিত অৱদান আগবঢ়াব লাগিব । ইয়াৰ বাবে সৰ্বোচ্চ দৰমহাৰ সীমা হ’ব ১৫ হাজাৰ টকা । বিশেষ কথাটো হ’ল কৰ্মচাৰীসকলে ই ডি এল আইলৈ কোনো অৱদান আগবঢ়োৱাৰ প্ৰয়োজন নাই ।
মনোনীত ব্যক্তিয়ে এককালীন বীমাৰ ধন লাভ কৰিব পাৰিব
কৰ্মসংস্থাপনৰ সময়ত কৰ্মচাৰীজনৰ মৃত্যু হ’লে মনোনীত ব্যক্তিয়ে এককালীন বীমাৰ ধন লাভ কৰিব পাৰিব । এই সুবিধাৰ হিচাপ কৰা হয় কৰ্মচাৰীজনে যোৱা ১২ মাহত লাভ কৰা গড় মাহিলী দৰমহাৰ ৩০ গুণৰ ভিত্তিত, ইয়াৰ সৰ্বোচ্চ সীমা ৫০ হাজাৰ টকা ।
ন্যূনতম নিশ্চিত সুবিধা ২.৫ লাখ টকা হোৱাৰ বিপৰীতে মাহিলী দৰমহাৰ সীমাৰ অধীনত সৰ্বোচ্চ সুবিধা ৭ লাখ টকালৈকে যাব পাৰে । এই আঁচনিখনে মৃত কৰ্মচাৰীৰ পৰিয়ালক আৰ্থিক আৰু সামাজিক সুৰক্ষা প্ৰদানৰ ক্ষেত্ৰত গুৰুত্বপূৰ্ণ ভূমিকা পালন কৰে ।
কেৱল এয়াই নহয়, এই আঁচনিখনত নিয়োগকৰ্তাই কৰ্মচাৰীজনৰ দৰমহাৰ ০.৫ শতাংশ বৰঙণি আগবঢ়ায় । কিন্তু যদিহে উন্নত বীমা পলিচী উপলব্ধ হয়, তেন্তে নিয়োগকৰ্তাই নিজৰ কৰ্মচাৰীসকলক গ্ৰুপ লাইফ বীমা পৰিকল্পনা আগবঢ়োৱাৰ বিকল্প লাভ কৰে, যিয়ে ই ডি এল আই পৰিকল্পনাতকৈ সমান বা অধিক কভাৰেজ প্ৰদান কৰে ।
এই আঁচনিৰ সুবিধা
কৰ্মচাৰীজনৰ মৃত্যুৰ ক্ষেত্ৰত মনোনীত বা উত্তৰাধিকাৰীয়ে বীমাৰ ধন লাভ কৰিব । তদুপৰি এই প্ৰক্ৰিয়া আৰম্ভ কৰিবলৈ প্ৰয়োজনীয় নথি-পত্ৰৰ সৈতে দাবী প্ৰ-পত্ৰ ই পি এফ অ’ত জমা দিব লাগিব । দাবীৰ ধনৰাশি পোনপটীয়াকৈ মনোনীত ব্যক্তিৰ বেংক একাউণ্টত জমা কৰা হ’ব । ইয়াৰ বাবে মনোনীত ব্যক্তিয়ে ই পি এফ অ’ৰ ৱেবছাইট বা ওচৰৰ কাৰ্যালয়ৰ পৰা ফৰ্ম ৫ আই এফ সংগ্ৰহ কৰিব লাগিব ।
লগতে পঢ়ক: পিএফৰ ধাৰকৰ বাবে আহিব পাৰে ভাল খবৰ...!
