নিউজ ডেস্ক, ১ ফেব্ৰুৱাৰী : বৃহস্পতিবাৰে প্ৰৱৰ্তন সঞ্চালকালয়ে গ্ৰেপ্তাৰ কৰা ঝাৰখণ্ডৰ প্ৰাক্তন মুখ্যমন্ত্ৰী হেমন্ত ছোৰেণ প্ৰায় নিশ্চিত আছিল যে তেওঁক গ্ৰেপ্তাৰ কৰা হ'ব ।
আনহাতে, তেওঁক গ্ৰেপ্তাৰ কৰাৰ পূৰ্বে দিয়া এটা ভিডিঅ' বাৰ্তাত তেওঁ কয়, "সম্ভৱত ইডিয়ে মোক আজি গ্ৰেপ্তাৰ কৰিব । কিন্তু মই চিন্তিত নহয়, কিয়নো মই শিবু ছোৰেণৰ পুত্ৰ... সম্পূৰ্ণ দিনটো সোধা-পোছাৰ অন্তত তেওঁলোকে মোৰ সৈতে কোনো সম্পৰ্ক নথকা বিষয়ত মোক গ্ৰেপ্তাৰ কৰাৰ সিদ্ধান্ত লয় । তেওঁলোকে এতিয়ালৈকে মোৰ বিৰুদ্ধে কোনো প্ৰমাণ পোৱা নাই । তেওঁলোকে মোৰ দিল্লীৰ বাসগৃহত অভিযান চলাই মোৰ ভাবমূৰ্তি বিনষ্ট কৰিবলৈ চেষ্টা কৰিছিল । যিসকলে দৰিদ্ৰ, আদিবাসী, দলিত আৰু নিৰীহ লোকক অত্যাচাৰ কৰে তেওঁলোকৰ বিৰুদ্ধে আমি এতিয়া এক নতুন যুঁজ দিব লাগিব...।"
উল্লেখ্য যে হেমন্ত ছোৰেণক বুধবাৰে চোৰাংচোৱাই ৰাঁচীত তেওঁৰ চৰকাৰী বাসভৱনত কেইবা ঘণ্টা ধৰি জেৰা কৰাৰ পিছত তেওঁক গ্ৰেপ্তাৰ কৰে । ইয়াৰ পূৰ্বে তেওঁ প্ৰায় এটা দিন সন্ধানহীন হৈ থকাৰ এক নাটক ৰচনা কৰে ।
মুখ্যমন্ত্ৰী হিচাপে তেওঁৰ পদত্যাগ-পত্ৰ জমা দিবলৈ ৰাজভৱনলৈ যোৱা ছোৰেণক পিছত গ্ৰেপ্তাৰ কৰা হয় আৰু তাৰ পিছত তেওঁৰ পৰা নেতৃত্ব সলনি কৰি ঝাৰখণ্ড মুক্তি মৰ্চাৰ জ্যেষ্ঠ নেতা চম্পাই ছোৰেণক নেতৃত্বৰ দায়িত্ব অৰ্পণ কৰা হয় ।
ঘটনাক্ৰমত ছোৰেণে ইডি বিষয়াসকলৰ বিৰুদ্ধে নিৰ্যাতনৰ অভিযোগ তোলে আৰু তেওঁলোকৰ বিৰুদ্ধে গোচৰ ৰুজু কৰে । তেওঁ লগতে কয় যে ইডিয়ে তেওঁৰ বিৰুদ্ধে একো গুৰুত্বপূৰ্ণ তথ্য বিচাৰি নোপোৱা সত্ত্বেও তেওঁক মানসিকভাৱে অত্যাচাৰ কৰিছে ।
