شجرکاری پروگرام کے تحت تمام مدارس میں مدر ٹری کے نام سے مہم چلائی جائے گی: دانش آزاد انصاری - Plantation Drive

ملک بھر میں مختلف مواقع پر شجرکاری مہم چلائی جاتی ہے۔ جس کے تحت مختلف قسم کے پودے لگائے جاتے ہیں۔ اس کا مقصد ماحولیاتی نظام کا تحفظ ہے۔

لکھنؤ: اتر پردیش کے وزیر مملکت (اقلیتی بہبود، مسلم وقف اور حج) دانش آزاد انصاری نے کہا ہے کہ وزیر اعلیٰ نے 20 جولائی 2024 کو ریاست میں 36.46 کروڑ پودے لگانے کا وعدہ کیا ہے۔ اس کے تحت محکمہ اقلیتی کے تحت چلنے والے مدارس میں 'ایک پیڑ ماں کے نام' مہم کو کامیاب بنانے کے لیے درخت لگائے جائیں گے۔

16 جولائی 2024 کو ریاستی وزیر نے اقلیتی بہبود کے ڈائرکٹر کو 20 جولائی 2024 کو بڑے پیمانے پر شجرکاری مہم کے تحت تمام مدارس میں پودے لگانے کی ہدایت دی ہے۔ انہوں نے کہا کہ تمام مدارس کو درخت بچاؤ مہم کے ہدف کو حاصل کرنے کی ہر ممکن کوشش کرنی چاہئے۔ اس کے علاوہ، ایک پروگرام کا اہتمام کریں اور مقامی انواع جیسے پاکڑ، پیپل، آم، مہوا وغیرہ کے درخت لگائیں۔

انصاری نے کہا کہ موسمیاتی تبدیلیوں کی وجہ سے قدرتی آفات میں اضافہ ہو رہا ہے۔ اس کے اثر سے قدرتی آفات جیسے بعض مقامات پر خشک سالی اور بعض مقامات پر زیادہ بارشیں واقع ہو رہی ہیں۔ جنگلات کی اندھا دھند کٹائی سے ماحولیاتی نظام متاثر ہو رہا ہے۔ آنے والی نسلوں کو صاف ستھرا ماحول فراہم کرنے کے لیے درخت لگانا ضروری ہے۔

انہوں نے کہا کہ مدارس کے لوگ ماحولیاتی تحفظ میں بڑھ کر کے حصہ لیتے ہیں شجرکاری مہم میں بھی بڑھ چڑھ کر حصہ لیں گے کیونکہ درخت لگانا اسلام مذہب میں سنت بتایا گیا اور باعث ثواب بھی کہا گیا ہے لہذا مدارس کے لوگ درخت لگائیں گے اور اس سے ماحولیاتی تحفظ کو یقینی بنایا جا سکے گا۔