بنگلورو سے ایودھیا اور گورکھپور آنے والے طیاروں میں بم رکھنے کی اطلاع، لکھنؤ کے بڑے ہوٹلز کو اڑانے کی دھمکی

بنگلور سے ایودھیا آرہے طیارے میں بم رکھنے اور لکھنو کے ہوٹلز کو اڑادینے کی دھمکی ملنے کے بعد پولیس کو الرٹ کردیا گیا۔

ایودھیا: طیاروں میں بم رکھنے کی دھمکیوں کا سلسلہ جاری ہے۔ ایک دن پہلے لکھنؤ ہوائی اڈے پر بنگلور جانے والی پرواز میں بم رکھنے کی فرصی اطلاع موصول ہوئی تھی اور اب بنگلورو سے ایودھیا آنے والے آکاسا ایئر لائنز کے طیارے میں بم کی اطلاع ملی ہے۔ اس کے بعد والمیکی بین الاقوامی ہوائی اڈے پر لینڈنگ کے بعد طیارے کی تلاشی لی گئی۔ اسی دوران بنگلورو سے گورکھپور آنے والی فلائٹ میں بھی بم کی جھوٹی دھمکی کے بعد خوف کا ماحول دیکھا گیا۔

دوسری طرف لکھنؤ کے بڑے ہوٹلوں کو بھی بم سے اڑانے کی نئی دھمکی سامنے آئی ہے۔ اس کے علاوہ 50 لاکھ روپے تاوان کا بھی مطالبہ کیا گیا ہے۔ دھمکیاں دی گئی ہیں کہ لکھنو کے ہوٹلوں میں بم چھپائے گئے ہیں، جس کے بعد پولیس کو الرٹ کردیا گیا۔

مہارشی والمیکی بین الاقوامی ایئرپورٹ کے ڈائریکٹر ونود کمار نے کہاکہ تمام 173 مسافروں کو جہاز سے اتار کر چیک کیا گیا۔ طیارے کے اندر بھی چیک کیا جارہا ہے۔ بی ڈی ڈی ایس ٹیم اور دیگر سیکورٹی ایجنسیاں اس معاملہ کی تحقیقات کررہی ہیں۔ اس دوران طیارے کو آئسولیشن پر بھیج دیا گیا ہے۔ فلائٹ میں بم رکھنے کی اطلاع ملنے پر فوری طور پر پولیس کے اعلیٰ حکام مہارشی والمیکی انٹرنیشنل ایئرپورٹ پہنچ گئے۔ ہنگامی صورتحال سے نمٹنے کے لیے تمام محکموں کو الرٹ کر دیا گیا تھا۔ تقریباً ڈھائی بجے طیارہ گورکھپور پہنچنے کے بعد جانچ کی گئی۔ فی الحال کسی قسم کا کوئی خطرہ سامنے نہیں آیا ہے۔ تاہم تفتیش جاری ہے۔