اوٹاوا: کینیڈا کے وزیراعظم جسٹن ٹروڈو نے اپنے عہدے سے استعفیٰ دے دیا ہے۔ انہوں نے یہ فیصلہ اپنی حکومت اور ذاتی طور پر تنقید کے درمیان لیا۔ ٹروڈو نے اپنے استعفے کا اعلان قوم سے خطاب میں کیا۔ ٹروڈو نے کہا کہ انہوں نے اپنی لبرل پارٹی کے صدر سے کہا ہے کہ وہ نئے لیڈر کے انتخاب کا عمل شروع کریں۔
جسٹن ٹروڈو نے حکمران لبرل پارٹی کے سربراہ کے عہدے سے مستعفی ہونے کا اعلان کر دیا ہے۔ 53 سالہ ٹروڈو نے پیر کو اوٹاوا میں ایک پریس کانفرنس میں کہا، "میں پارٹی کے رہنما اور وزیر اعظم کے عہدے سے استعفیٰ دینے کا ارادہ رکھتا ہوں جب پارٹی نئے رہنما کا انتخاب کرے گی۔"
نئے رہنما کے انتخاب تک ٹروڈو نگران حیثیت میں وزیر اعظم رہیں گے۔
جسٹن ٹروڈو گیارہ سال لبرل پارٹی کے رہنما اور نو سال وزیر اعظم رہے۔ ان کو ڈونلڈ ٹرمپ کی ٹیرف دھمکیوں سے لے کر اہم معاونین کے استعفوں اور رائے عامہ کے جائزوں تک کئی بحرانوں کا سامنا تھا۔
جسٹن ٹروڈو نے اپنے خطاب میں کہا کہ 'یہ ملک اگلے انتخابات میں حقیقی انتخاب کا حقدار ہے اور مجھ پر یہ واضح ہو گیا ہے کہ اگر مجھے اندرونی لڑائی لڑنی ہے تو میں اس انتخاب میں بہترین انتخاب نہیں ہو سکتا'۔
ٹروڈو نے مزید کہا کہ "ایک نیا وزیر اعظم اور لبرل پارٹی کا رہنما اگلے انتخابات میں اپنی اقدار اور نظریات لے کر جائے گا۔ میں آنے والے مہینوں میں اس عمل کو دیکھنے کا منتظر ہوں"۔
