نالندہ: بہار کے نالندہ ضلع میں واقع اسلام پور تھانہ حلقہ کے خانقاہ محلہ کے مدرسہ حمایت اللہ میں مرکزی تفتیشی ایجنسی ' این آئی اے ' نے پہنچ کر تفتیش کی ہے۔ این آئی اے یہ ساتھ مقامی تھانہ کی پولیس اور بلاک ترقیاتی افسر بھی شامل تھے۔ چھاپے ماری کی اصل وجہ بیرون ملک سے فنڈنگ کا معاملہ بتایا جا رہا ہے۔ حالانکہ اس حوالے سے نا تو این آئی اے اور نہ ہی ضلع پولیس نے چھاپے ماری کی اصل وجہ کا انکشاف کیا ہے۔ حالانکہ مدرسے میں این آئی اے کی ٹیم کے پہنچنے سے علاقے میں سراسیمگی پھیل گئی۔
اطلاع کے مطابق این آئی اے کی ٹیم نے مدرسہ کے سیکریٹری ڈاکٹر منظر اقبال سے گھنٹوں پوچھ تاچھ کی ہے۔ مدرسہ کے علاوہ این آئی اے اور پولیس کی ٹیم نے کئی مشکوک مقامات پر بھی چھاپے مارے اور وہاں کی گہرائی سے تلاشی لی۔ اسلام پور میں کئی گھنٹوں کی تفتیش کے بعد این ائی اے کی ٹیم واپس لوٹ گئی۔ کہا جا رہا ہے کہ اس چھاپے ماری میں مدرسہ سے این آئی اے کی ٹیم کو کوئی اہم دستاویز نہیں ملے ہیں۔ البتہ یہ ضرور کہا جارہا ہے کہ سکریٹری کے موبائل فون ٹیم اپنے ساتھ لے کر گئی ہے۔