پٹنہ: ممبئی میں بابا صدیقی قتل کے معاملے میں پپو یادو نے برہمی کا اظہار کیا۔ سوشل میڈیا پلیٹ فارم ایکس پر پوسٹ کرتے ہوئے انہوں نے دو ٹوک الفاظ میں لارنس بشنوئی جیسے گینگ کو ختم کرنے کی تنبیہ کی ہے۔ پپو یادو نے لکھا کہ جیل میں بیٹھا ایک مجرم لوگوں کو چیلنج کر رہا ہے اور مار رہا ہے۔ اور حکومت سے لے کر پولیس تک سب خاموش تماشائی بنے ہوئے ہیں۔ انہوں نے سدھو موسی والا اور کرنی سینا کی مثال دی۔
بہار کے پورنیا سے رکن پارلیمنٹ پپو یادو نے ایکس پر پوسٹ کرتے ہوئے لکھا کہ "یہ ملک ہے یا خواجہ سراؤں کی فوج، کوئی مجرم جیل میں بیٹھ کر لوگوں کو للکار رہا ہے اور مار رہا ہے، سب خاموش تماشائی بنے ہوئے ہیں، کبھی موسی والا، کبھی کرنی سینا کا سربراہ، اب ایک صنعتکار سیاستدان کا قتل کر ڈالا۔ اگر قانون اجازت دیتا ہے تو میں لارنس بشنوئی جیسے دو ٹکے کے مجرم کے پورے نیٹ ورک کو 24 گھنٹے میں تباہ کر دوں گا۔''
جیل میں بیٹھا آدمی نہیں سنبھل رہا:
پپو یادو نے ای ٹی وی بھارت سے بات کرتے ہوئے کہا کہ ایک آدمی 140 کروڑ کی آبادی سے اوپر ہو گیا ہے۔ وہ جیل میں بیٹھ کر قانون کی دھجیاں اڑا رہا ہے۔ اندر بیٹھا لوگوں کو مارنے کا چیلنج دے رہا ہے۔ کہہ رہا ہے کہ بچنا ہے تو بھاگو۔ تم جو کرنا چاہتے ہو کرو۔ ملک کی عدالتوں کے بارے میں انہوں نے یہ بھی کہا کہ آج تک کسی عدالت نے اس معاملے کا از خود نوٹس نہیں لیا۔ کیا ہمارے ملک کی فوج کمزور نہیں؟ ایک آدمی جیل میں بیٹھ کر کچھ بھی کر رہا ہے۔