حیدرآباد: تلنگانہ کے رنگاریڈی ضلع کے شاد نگر میں واقع ساؤتھ گلاس انڈسٹری میں گیس کمپریشر پھٹنے سے 5 مزدور ہلاک ہوگئے، جن کا تعلق یوپی، بہار اور اڈیشہ سے بتایا جا رہا ہے۔ اس المناک حادثے میں 15 لوگ زخمی بھی ہوگئے ہیں جن کا علاج مقامی اسپتال میں چل رہا ہے۔ نیوز کے مطابق کمپریشر پھٹنے سے مزدوروں کی لاشیں ٹکڑے ٹکڑے ہو گئیں۔ اس دھماکے سے پورے علاقے میں خوف وہراس پھیل گیا۔
تلنگانہ کے وزیر اعلیٰ ریونت ریڈی نے متعلقہ عہدیداروں کو امدادی کاموں میں تیزی لانے کی ہدایت دی ہے۔ رنگاریڈی ڈسٹرکٹ کلکٹر ششانک، شمش آباد ڈی سی پی راجیش نے موقع پر پہنچ کر صورتحال کا جائزہ لیا۔ معلومات کے مطابق دھماکہ کمپریشر میں خرابی کے باعث ہوا۔
بہار، یوپی اور اڈیشہ سے کام کرنے آئے مزدوروں کی موت
مرنے والوں میں مختلف ریاستوں کے لوگ شامل ہیں جس میں اتر پردیش کے دو مزدور نکیت (22)، رام سیتو (24)، بہار کے چترنجن (25)، رام پرکاش (45) اور اڈیشہ کے رادھے کانت (25) شامل ہیں۔ اس خوفناک دھماکے کی اطلاع ملتے ہی پورے علاقے میں کہرام مچ گیا۔ اطلاع ملنے پر پولیس اور فائر بریگیڈ نے موقع پر پہنچ کر آگ پر قابو پالیا۔ شمش آباد کے ڈی سی پی راجیش نے موقع پر پہنچ کر صورتحال کا جائزہ لیا۔ حادثہ کیسے ہوا اس بارے میں ابھی تک معلومات دستیاب نہیں ہیں بس اتنا ہی معلوم ہوا ہے کہ کمپریشر میں خرابی آنے کی وجہ سے یہ دھماکہ ہوا ہے۔
متاثرین کے لواحقین کو معاوضہ دینے کا مطالبہ:
خبر ہے کہ شدید زخمیوں کو بہتر علاج کے لیے عثمانیہ اور گاندھی اسپتالوں میں منتقل کیا گیا ہے۔ اس کے ساتھ ساتھ دھماکے میں مرنے والوں کی تعداد میں اضافے کا خدشہ ظاہر کیا جا رہا ہے۔ دوسری جانب اس واقعے کے بعد ٹریڈ یونین رہنماؤں کا مطالبہ ہے کہ متاثرہ خاندانوں کے لیے فی کس 25 لاکھ روپے کے حساب سے معاوضے کا اعلان کیا جائے۔
