نئی دہلی:114 رنز کے ہدف کے تعاقب میں رائل چیلنجرز بنگلور کی شروعات اچھی نہیں رہی اور 25 کے اسکور پر اس کی دو وکٹیں گر گئیں۔ کپتان اسمرتی مندھانا 11 رنز بنانے کے بعد اور سوفی مولینو نو رنز بنانے کے بعد آؤٹ ہوئیں۔ اس کے بعد ساتویں اوور میں اسماعیل نے سوفی ڈیوائن کو چار رنز پر آؤٹ کیا۔ 39 کے اسکور پر تین وکٹیں گرنے کے ساتھ ہی ایلیس پیری اور ریچا گھوش نے اننگز کو سنبھالا۔ ایلیس پیری نے 38 گیندوں میں پانچ چوکوں اور ایک چھکے کی مدد سے ناٹ آؤٹ 40 رنز بنائے۔ وہیں ریچا گھوش نے 28 گیندوں پر چار چوکوں اور دو چھکوں کی مدد سے 36 رنز کی اننگز کھیلی۔ رائل چیلنجرز بنگلور نے 15 اوورز میں تین وکٹ پر 115 رنز بنانے کے بعد سات وکٹوں سے میچ جیت لیا۔
ممبئی انڈینز کی جانب سے شبنم اسماعیل، ہیلی میتھیوز اور نیٹ سائور برنٹ نے ایک ایک بلے باز کو آؤٹ کیا۔اس سے قبل آج رائل چیلنجرز بنگلور ویمن نے ٹاس جیت کر پہلے گیند بازی کرنے کا فیصلہ کیا۔ ایلیس پیری نے کپتان اسمرتی مندھانا کے فیصلے کو درست ثابت کیا۔ بیٹنگ کے لیے آنے والی ممبئی انڈینز ویمن کی شروعات اچھی رہی۔
اوپنرز ہیلی میتھیوز اور سنجیون سجنا نے پہلی وکٹ کے لیے 43 رنز جوڑے۔ چھٹے اوور میں ڈیوائن نے ہیلی میتھیوز کو 26 رنز پر پیری کے ہاتھوں کیچ آؤٹ کروا کر ممبئی کو پہلا جھٹکا دیا۔ اس کے بعد نویں اوور میں پیری نے سنجیون سجنا کو 30 رنز پر آؤٹ کر کے پویلین بھیج دیا۔ اسی اوور میں پیری نے کپتان ہرمن پریت کور کو صفر پر بولڈ کیا۔