بھارت کو ابھی بھی دوسرے میڈل کی تلاش، رمیتا کے بعد ارجن بھی تمغہ حاصل کرنے میں ناکام - Paris Olympics 2024

پیرس اولمپکس کے تیسرے دن بھارت نے دوسرا تمغہ کھو دیا ہے۔ شوٹنگ میں دس میٹر ایئر رائفل کے فائنل راونڈ میں ارجن ببوتا نے چوتھی پوزیشن حاصل کی، جس کی وجہ سے وہ میڈل کی ریس سے باہر ہوگئے۔ اس سے قبل رمیتا جندال بھی فائنل راونڈ میں میڈل جیتنے سے چوک گئی تھیں۔

پیرس: پیرس اولمپکس کے تیسرے دن بھارت نے اپنا دوسرا تمغہ کھو دیا ہے۔ کوالیفکیشن راؤنڈ میں ساتویں مقام پر رہنے والے ارجن ببوتا 10 میٹر ایئر رائفل انفرادی فائنل راونڈ میں چوتھے مقام پر رہے۔ جس کی وجہ سے وہ کوئی بھی میڈل نہیں حاصل کر سکے۔ ارجن ببوتا 0.9 کے فرق سے میڈل سے محروم رہے۔

اس سے قبل بھارتی شوٹر رمیتا جندال 10 میٹر ایئر رائفل خواتین کے ایونٹ میں تمغہ حاصل کرنے میں ناکام ہوگئیں تھیں۔ انھوں نے فائنل راونڈ میں ساتویں پوزیشن حاصل کی جس کی وجہ سے بھارت کو وہ کوئی بھی میڈل نہیں دلا سکیں۔

لیکن 10 میٹر ایئر پسٹل مکسڈ ٹیم ایونٹ میں منو بھاکر اور سربجوت سنگھ نے بھارت کو خوشی کا موقع فراہم کیا اور کانسے کے تمغے کے لیے کوالیفائی کر لیا ہے۔ جس سے بھارت کو ان سے میڈل کی امیدیں بڑھ گئی ہے۔

قابل ذکر ہے گزشتہ روز خواتین کے دس میٹر ایئر پسٹل میں منو بھاکر نے بھارت کو پہلا تمغہ دلایا تھا۔ انھوں نے فائنل راونڈ میں تیسری پوزیشن حاصل کی تھیں، جس کی وجہ سے انھوں نے کانسے کے تمغے پر قبضہ کرکے تاریخ رقم کردی۔

بھارت کو اب اولمپکس گیمز کے تیسرے دن تیر اندازی میں مردوں کی ٹیم سے امیدیں وابستہ ہیں۔تیر اندازی میں مردوں کی ٹیم (تروندیپ رائے، دھیرج بومادیورا، پروین جادھو) کا کوارٹر فائنلمیچ کا بھارتی وقت کے مطابق شام 5:45 بجے کھیلا جائے گا۔ اگر یہ ٹیم کوارٹر فائنل جیت جاتی ہے تو پھر یہ ٹیم فائنل راؤنڈ میں داخل ہو جائے گی۔