اسرائیلی فوج کا پانچ غیر مسلح فلسطینیوں پر ڈرون سے حملہ، اقوام متحدہ نے جانچ کا مطالبہ کیا - Israeli Genocide in Gaza

Israeli Drone Attack حالانکہ اسرائیل غزہ میں نسل کشی کے الزامات کی تردید کرتا ہے لیکن ایک ایسا ویڈیو منظر عام پر آیا ہے جس میں اسرائیلی ڈرون نہتے غیر مسلح فلسطینیوں پر ڈرون سے میزائل داغ رہا ہے۔ اس حملے میں کم از کم پانچ عام فلسطینی جاں بحق ہوئے ہیں۔ اقوام متحدہ نے پورے معاملے کی جانچ کا مطالبہ کیا ہے۔

اقوام متحدہ: جنوبی غزہ کی پٹی کے خان یونس میں اسرائیلی فوج نے ڈرون کا استعمال کرتے ہوئے چار نہتے عام فلسطینیوں کو ہلاک کر دیا۔ سوشل میڈیا پر اسرائیل کی نسل کشی کا یہ ویڈیو خوب وائرل ہو رہا ہے۔ چار فلسطینی شہریوں پر بمباری کرتے ہوئے فوٹیج پر شدید غم و غصے کا اظہار کرتے ہوئے اقوام متحدہ نے کہا ہے کہ اس واقعے کی تحقیقات کی ضرورت ہے۔

اقوام متحدہ کے نائب ترجمان فرحان حق نے الجزیرہ چینل کی طرف سے نشر ہونے والی فوٹیج پر تبصرہ کرتے ہوئے کہا کہ، "سیکرٹری جنرل (انٹونیو گوٹیرس) ویڈیو فوٹیج سے سخت تشویش میں مبتلا ہیں۔"

حق نے بتایا کہ گوٹیرس نے غیر مسلح فلسطینیوں کے قتل کی "مکمل، آزاد اور قابل اعتماد" تحقیقات کا مطالبہ کیا ہے۔ فرحان حق نے کہا کہ، اقوام متحدہ کے سربراہ نے تمام فریقوں سے بین الاقوامی انسانی قانون کی پاسداری کرنے کی اپیل کی ہے۔

یہ ویڈیو فروری میں خان یونس میں ایک اسرائیلی ڈرون سے حاصل کیا گیا ہے، جس میں چار فلسطینیوں کا تعاقب اور انہیں کئی میزائلوں سے نشانہ بناتے ہوئے دکھایا گیا تھا۔

فوٹیج میں دکھایا گیا ہے کہ نوجوان اپنے گھروں کو تلاش کر رہے ہیں یا علاقے سے نقل مکانی سے پہلے فوج کی گاڑیوں کے ذریعے صاف کی گئی سڑک پر ملبے کے درمیان کچھ ڈھونڈ رہے ہیں۔ فوٹیج سے واضح ہوتا ہے کہ چاروں شہریوں کے پاس ہتھیار نہیں تھے اور ان سے کوئی خطرہ نہیں تھا۔

اسرائیل کی فوج کا کہنا ہے کہ اس نے جنوبی غزہ کی پٹی میں ایک فضائی حملے کی تحقیقات شروع کر دی ہیں جس میں بظاہر پانچ فلسطینی مارے گئے تھے۔

فوٹیج کی اصلیت ابھی تک واضح نہیں ہے۔ لیکن جمعہ کو ایک بیان میں، اسرائیلی فوج نے کہا کہ فضائی حملہ جنوبی غزہ کے قصبے خان یونس میں ہوا، جو کہ فروری کے اوائل میں حماس کے خلاف فوجی کارروائیوں کا مرکز تھا۔

فوج نے کہا کہ ویڈیو کی تحقیقات اس کی خصوصی "فیکٹ فائنڈنگ" باڈی کے ذریعے کی جا رہی ہے جسے اس کی فورسز کے ممکنہ جرائم کی تحقیقات کا کام سونپا گیا ہے۔

جنوبی افریقہ نے بین الاقوامی عدالت انصاف میں ایک مقدمہ دائر کیا ہے جس میں اسرائیل پر نسل کشی کا الزام لگایا ہے۔ غزہ میں اب تک 32,000 سے زیادہ فلسطینی، جن میں زیادہ تر خواتین اور بچے ہیں، مارے جا چکے ہیں، اور تقریباً 74،300 افراد بڑے پیمانے پر تباہی اور ضروریات کی قلت کے باعث زخمی ہو چکے ہیں۔