غزہ سے درجنوں مریضوں اور زخمیوں کو علاج کے لیے نکالا گیا، یو اے ای میں کیا جائے گا علاج

غزہ سے مریضوں اور زخمیوں کو علاج کے لیے متحدہ عرب امارات لے جایا جا رہا ہے۔

غزہ: اسرائیلی جارحیت کے شکار غزہ سے درجنوں مریضوں اور زخمیوں کو باہر علاج کے لیے نکالا گیا ہے۔ اقوام متحدہ کا کہنا ہے کہ غزہ کی پٹی میں اسپتالوں اور اس کے آس پاس اسرائیل کے حملوں نے صحت کی دیکھ بھال کو دہانے پر پہنچا دیا ہے۔

فلسطینی محکمہ صحت کے حکام نے بتایا کہ، منگل کے روز 45 مریضوں جس میں زخمی بھی شامل ہیں جنوبی شہر خان یونس کے یورپی اسپتال سے نکالے گئے اور کریم شالوم کراسنگ کے ذریعے اسرائیل پہنچائے گئے۔ محکمہ صحت کے مطابق ان مریضوں کا علاج متحدہ عرب امارات میں کرایا جائے گا۔

ان 45 مریضوں میں ایک 10 سالہ لڑکا عبداللہ ابو یوسف بھی ہے جس کے گردے ناکارہ ہو چکے ہیں۔ اسرائیلی حکام نے بچے کے ساتھ اس کی والدہ کی شمولیت کی درخواست کو مسترد کر دیا۔ حالانکہ بعد میں مریض کو اس کی بہن کے ہمراہ روانہ کیا گیا۔ اسرائیل نے درخواست کو مسترد کیے جانے پر وضاحت دیتے ہوئے کہا کہ وہ سیکیورٹی کے لیے ایسکارٹس کی اسکریننگ کرتا ہے۔

عبداللہ ابو یوسف کی ماں عبیر ابو یوسف نے کہا کہ، لڑکا بیمار ہے، اسے ہفتے میں تین سے چار دن ہیموڈالیسس کی ضرورت ہوتی ہے۔

وزارت صحت کا کہنا ہے کہ غزہ میں کئی ہزار فلسطینیوں کو بیرون ملک علاج کی ضرورت ہے۔ اسرائیل نے مئی میں جنوبی شہر رفح پر قبضہ کرنے کے بعد سے داخلی اور خارجی راستوں کو کنٹرول کر رکھا ہے۔ 7 اکتوبر 2023 سے جاری اسرائیلی کے حملوں نے علاقے کے صحت کی دیکھ بھال کے نظام کو تباہ کر دیا ہے اور اس کے بیشتر اسپتالوں کو کام کاج پوری طرح سے بند کرنے پر مجبور کر دیا ہے۔ جو اسپتال کارگر ہیں وہ صرف جزوی طور پر کام کر رہے ہیں۔

واضح رہے، گزشتہ ہفتے صیہونی فوج نے کمال عدوان اسپتال سے مریضوں کو باہر نکال دیا اور اسپتال میں آگ لگا دی تھی۔ یہی نہیں اسرائیل نے اسپتال کے ڈائریکٹر سمیت کئی مریضوں کو گرفتار بھی کر لیا۔