ایودھیا کی طرح گجرات میں بھی بی جے پی کو شکست دیں گے: راہل گاندھی - RAHUL GANDHI GUJARAT VISIT

کانگریس رہنما و لوک سبھا میں لیڈر آف اپوزیشن راہل گاندھی نے آج گجرات کا دورہ کیا جہاں انہوں نے راجکوٹ گیمنگ زون کے متاثرین اور کانگریس کارکنوں سے ملاقات کی۔ راہل گاندھی کے کانگریس کے صدر دفتر میں کارکنوں سے خطاب بھی کیا۔

احمدآباد:راہل گاندھی نے آج گجرات کا دورہ کیا جہاں انہوں نے راجکوٹ گیمنگ زون حادثے کے متاثرین اور دیگر سے ملاقات کی۔ راہل گاندھی کے دورہ کے موقع پر گجرات کانگریس دفتر پر کانگریس کارکنوں کا جم غفیر جمع ہوا۔ اس موقع پر ای ٹی وی بھارت نمائندہ نے کانگریس کارکنان سے خصوصی گفتگو کی۔ کانگریس کارکنان نے کہا کہ گجرات کانگریس کمیٹی پر جس طریقے سے راہل گاندھی کے بیان کے بعد حملہ کیا گیا کانگریس کمیٹی پر نشانہ بنایا گیا اس کے خلاف آواز اٹھانے کے لیے آج راہل گاندھی احمد اباد آئے اور احمد آباد میں انہوں نے ہمارے اندر ایک نیا جوش و ولولہ پیدا کیا ہے۔

کانگریس کارکنوں نے بات کرتے ہوئے کہا کہ راہل گاندھی نے ڈرو نہیں ڈراؤ نہیں کا نعرہ دیا ہے، ہم اس پر قائم رہیں گے ہم اب کسی سے ڈریں گے نہیں، اور گجرات میں بدلاؤ لائیں گے، گجرات میں بہت سارے حادثات ہوئے ہیں، خاص طور سے راجکوٹ گیم زون میں آتشزدگی کا کا معاملہ پیش آیا۔ گیمنگ زون کے متاثرین سے راہل گاندھی نے ملاقات کی۔

کانگریس کے ایک کارکن نے بات کرتے ہوئے کہا کہ بہت سالوں بعد راہل گاندھی گجرات آئے ہیں اور انہوں نے جو جوش ہمارے اندر پیدا کیا ہے اس سے ضرور کچھ بدلاؤ آئے گا اور اب کے الیکشن میں یہ بدلاؤ دکھائی دے گا، بی جے پی کو شکست حاصل ہوگی۔

گجرات کے احمدآباد میں کانگریس کے ہیڈکوارٹر میں راہل گاندھی نے اپنے خطاب کے دوران بی جے پی پر زبردست نکتہ چینی کی اور کہا کہ آئندہ الیکشن میں کانگریس گجرات میں جیت حاصل کرے گی۔ راہل گاندھی نے کہا کہ گجرات میں اسمبلی انتخابات کو ابھی تین سال باقی ہیں اگر ہم گجرات میں کانگریسی حکومت بنانے کے لیے اکٹھا ہوتے ہیں تو ہم بی جے پی کو شکست دے انتخابات میں کامیابی حاصل کرسکتے ہیں۔ ادیودھیا میں بی جے پی کی شکست کا ذکر کرتے ہوئے راہل گاندھی نے کہا کہ وزیراعظم نریند مودی کا پورا غبارہ پھٹ گیا ہے۔