بنگلورو: 34 سالہ انجینئر اتل سبھاش نے کرناٹک کے دارالحکومت بنگلورو میں اپنے گھر میں خودکشی کرلی۔ معلومات کے مطابق وہ اتر پردیش کا رہنے والا تھا۔ خودکشی کرنے سے پہلے اتل نے 24 صفحات کا ایک نوٹ بھی چھوڑا ہے، جس میں اس نے اپنی بیوی اور اس کے اہل خانہ پر ہراسانی اور جھوٹے مقدمے کا الزام لگایا ہے۔
اتل نے اپنے خودکشی نوٹ میں لکھا ہے کہ میں نے رقم دینے سے انکار کرتا ہوں اور موت کو گلے لگاتا ہوں کیونکہ میں نہیں چاہتا کہ میرے مخالفین اس رقم کا استعمال میرے خاندان کو ہراساں کرنے کے لیے کریں۔ انہوں نے مزید لکھا کہ ان کی راکھ عدالت کے باہر گٹر میں پھینک دی جائے۔ اس سے انصاف کا عمل زیربحث آ گیا ہے۔ پولیس نے مقدمہ درج کر کے مزید تفتیش شروع کر دی ہے۔
مقتول کے بھائی وکاس کمار نے بتایا کہ میرے بھائی کی بیوی سے علیحدگی کے تقریباً 8 ماہ بعد اس نے طلاق کا مقدمہ درج کرایا اور میرے بھائی اور ہمارے پورے خاندان پر مختلف دفعات کے تحت کئی الزامات لگائے۔ مقتول کے بھائی نے سوال کیا کہ، کیا ہندوستان میں ہر قانون خواتین کے لیے ہے، مردوں کے لیے نہیں؟ میرے بھائی نے اس کے لیے جنگ لڑی، لیکن اس نے ہمیں چھوڑ دیا۔ اس نے اپنے خودکشی نوٹ میں یہاں تک لکھا ہے کہ اگر میں سسٹم سے جیت گیا تو میری راکھ گنگا میں بہا دو، ورنہ عدالت کے باہر گٹر میں پھینک دو۔
وکاس نے مزید کہا کہ میرے بھائی نے ان کے لیے سب کچھ کیا۔ جو بھی ہوا بدقسمتی سے ہوا۔ اگر وہ کبھی مجھ سے یا ہمارے والد سے اس بارے میں بات کرتا تو ہم اس کی اس صورتحال سے نکلنے میں مدد کرتے۔ میں حکومت ہند اور صدر جمہوریہ سے درخواست کرنا چاہتا ہوں کہ اگر وہ سچ کے ساتھ ہیں تو میرے بھائی کو انصاف ملنا چاہیے ورنہ مجھے ثبوت دیں کہ وہ غلط ثابت ہو۔ جس جج کا نام میرے بھائی کے سوسائڈ نوٹ میں ہے اس کے خلاف مناسب تحقیقات ہونی چاہیے۔
پولیس کو پیر کی صبح چھ بجے ہویسالہ پولیس کنٹرول روم میں خودکشی سے متعلق ایک کال موصول ہوئی، پولیس کے مطابق، متوفی کی شناخت اتل سبھاش کے طور پر ہوئی، جو یو پی کا تھا بنگلور میں مقیم تھا۔ پولیس کا کہنا ہے کہ انہیں لاش کے پاس سے ایک پلے کارڈ بھی ملا جس پر لکھا تھا، انصاف ضرور ملنا چاہیے۔
پولیس نے فوری کارروائی کرتے ہوئے سبھاش کے بھائی وکاس کمار کو فون کر کے واقعہ کی اطلاع دی۔ وکاس نے بعد میں سبھاش کی بیوی، اس کی ساس، اس کی بھابھی اور اس کی بیوی کے چچا کے خلاف شکایت درج کروائی، اور الزام لگایا کہ انہوں نے سبھاش کے خلاف جھوٹی شکایت درج کروائی اور تصفیہ کے لیے 3 کروڑ روپے کا مطالبہ کیا۔
شکایت میں کمار نے کہا کہ جھوٹی شکایت اور اس کے بعد ہونے والے واقعات بشمول بھاری رقم کی مانگ نے سبھاش کو ذہنی اور جسمانی طور پر توڑ دیا اور بالآخر اسے یہ جان لیوا قدم اٹھانے پر مجبور ہونا پڑا۔ پولیس نے بتایا کہ سبھاش نے جونپور، اتر پردیش میں ایک فیملی کورٹ کے ایک اہلکار پر رشوت لینے کا الزام لگایا ہے۔