حیدرآباد : معروف اسلامی اسکالر مفتی سلمان ازہری کو سپریم کورٹ نے فوری رہا کرنے کا حکم دیا ہے۔ ان کی رہائی کا شدت سے مطالبہ کیا جاتا رہا ہے۔ آپ کو بتا دیں کہ مفتی سلمان ازہری کو گجرات پولیس کی جانب سے دائر تین مقدمات میں مقامی عدالتوں کی جانت سے ضمانت مل چکی تھی، جس کے بعد گجرات پولیس نے انہیں انسداد سماجی سرگرمیوں (PASA) ایکٹ کے تحت مقدمہ درج کرکے جیل بھیج دیا تھا۔ وہ تقریباً 10 ماہ سے جیل میں قید ہیں۔
سپریم کورٹ نے مفتی سلمان ازہری کو وڈودرا جیل سے رہا کرنے کا حکم دیا ہے۔ ساتھ ہی PASA کے تحت ازہری کی تحویل کو بھی منسوخ کر دیا گیا۔ مفتی سلمان ازہری کو گجرات پولیس کی خصوصی ٹیم نے جاریہ سال 4 فروری کو اشتعال انگیز تقریر کرنے کے الزام میں گرفتار کیا تھا۔ انہیں ممبئی سے گرفتار کرکے گجرات لے جایا گیا۔ ان پر الزام تھا کہ انہوں نے جوناگڑھ میں ایک پروگرام میں مبینہ طور پر اشتعال انگیز تقریر کی تھی۔