جموں: جموں اور کشمیر کے کشتواڑ ضلع میں پولیس نے علاقے میں سرگرم چار عسکریت پسندوں کی تصاویر جاری کی ہیں اور کہا ہے کہ وہ علاقے میں عسکریت پسندی سرگرمیوں کے ذمہ دار ہیں، جن میں دو ویلج ڈیفنس گارڈ (وی ڈی جی) کے ارکان کی ہلاکت بھی شامل ہے۔
پولیس کے مطابق تین عسکریت پسندوں کی شناخت سیف اللہ، فرمان اور عادل کے نام سے ہوئی ہے جب کہ چوتھے عسکریت پسند کی شناخت ہونا باقی ہے۔
ای ٹی وی بھارت سے بات کرتے ہوئے ایس ایس پی کشتواڑ جاوید اقبال نے کہا کہ یہ عسکریت پسند ضلع کشتواڑ میں سرگرم ہیں اور ڈوڈہ اور اننت ناگ اضلاع میں آتے جاتے رہتے ہیں۔
وادی چناب میں عسکریت پسندی کے واقعات میں اضافے کے بعد، یہ چار عسکریت پسند سیکورٹی فورسز کو مشکل وقت دے رہے ہیں کیونکہ وہ موسم کی خرابی کے باوجود ان تینوں اضلاع کے بالائی علاقوں میں آزادانہ نقل و حرکت کر رہے ہیں۔
