سب سے وزنی بکرے کا خطاب 'رستم' کے نام، وزن جان کر رہ جائیں گے حیران - heaviest goat

ریاست مدھیہ پردیش کے صنعتی شہر اندور میں عید الاضحی سے قبل 'بکرا بازی' نام کی تنظیم نے قربانی کے وزنی بکروں کے مقابلے کا انعقاد کیا جس میں رستم نام کا بکرا سب سے زیادہ وزنی قرار دیا گیا۔

اندور:عید الاضحی کے قریب آتے ہی ملک بھر میں قربانی کے جانوروں کے بازار سجنا شروع ہو جاتے ہیں۔ ہر کسی کو تندرست اور وزنی جانور کی تلاش ہوتی ہے۔ وہیں ریاست مدھیہ پردیش کے شہر اندور میں بکرا بازی تنظیم نے وزنی بکروں کا مقابلہ منعقد کیا، جس میں رستم نام کے بکرے نے 172 کلوگرام کا ریکارڈ درج کر کے پہلا مقام حاصل کیا۔
بکرا بازی کی جانب سے منعقدہ اس مقابلے میں مختلف نسل کے تندرست بکروں نے حصہ لیا۔ وہیں اس موقعے پر مقابلے میں دلچسپی رکھنے والوں اور کاروباریوں میں زبردست جوش و خروش دیکھا گیا۔ بکرا بازی تنظیم کے صدر کا کہنا تھا کہ اندور اور اطراف و اکناف کے بکرے کے شوقین لوگوں نے اس مقابلے میں حصہ لیا۔ ہمارا مقصد اندور اور اس پاس کے عولاقوں میں موجود شائقین اور اچھے بکروں کے خواہش مند افراد کو مقابلہ کے ذریعے ایک اچھا موقع فراہم کرنا ہے، نیز قربانی کی سنت کی طرف لوگوں کو متوجہ کرنا بھی ہے۔

عید الاضحی کے موقعے پر دنیا بھر میں ہر سال مسلمان سنت براہیمی کو تازہ کرتے ہیں۔ اس موقعے پر ایسے ایونٹ سے قربانی کی اہمیت و فضیلت سے ناواقف لوگوں کو اس میں دلچسپی پیدا ہوگی۔