ضابطہ اخلاق کی خلاف ورزی کے معاملے میں اداکارہ جیا پردا باعزت بری - Jaya Prada Acquitted

رام پور کی ایم پی ایم ایل اے کورٹ نے سابق ایم پی اور اداکارہ جیا پردا کو 2019 میں ضابطہ اخلاق کی خلاف ورزی کے معاملے میں باعزت بری کر دیا ہے۔

رام پور: ایم پی ایم ایل اے کی ایک خصوصی عدالت نے فلم اداکارہ اور سابق رکن پارلیمنٹ جیا پردا کو ضابطہ اخلاق کی خلاف ورزی کے معاملے میں بری کر دیا ہے۔ 2019 کے لوک سبھا انتخابات میں جیا پردا نے رام پور سے بھارتیہ جنتا پارٹی کے ٹکٹ پر الیکشن لڑا تھا۔

اس وقت انتخابی مہم کے دوران انھوں نے سماجوادی پارٹی کے سینیئر لیڈر اعظم خان کے خلاف توہین آمیز لفظ کا استعمال کیا تھا جس کی وجہ سے کیمری تھانے میں انتخابی ضابطہ اخلاق کی خلاف ورزی کا مقدمہ درج کرایا گیا۔

اس کیس کی سماعت ایم پی ایم ایل اے کی خصوصی عدالت میں چل رہی تھی۔ایم پی ایم ایل اے کی خصوصی عدالت نے جمعرات کو اپنا فیصلہ سنایا اور جیا پردا کو باعزت بری کر دیا۔

2019 کے لوک سبھا انتخابات کے دوران کیمری تھانہ علاقے میں ایک جلسہ عام کے دوران جیا پردا نے ایس پی لیڈر اعظم خان کے بارے میں کہا تھا کہ مایاوتی جب رام پور آئیں تو انہیں ہوشیار رہنا چاہیے۔ کیونکہ ہم نہیں جانتے کہ اعظم خان کی آنکھیں کہاں جاتی ہیں۔

عدالت سے راحت ملنے کے بعد جیا پردا نے عدالت کے باہر میڈیا سے بات کرتے ہوئے کہا کہ میں معزز عدالت کا شکریہ ادا کرنا چاہتی ہوں۔ کیونکہ ان کو معلوم ہوگیا کہ اس میں میرا کوئی قصور نہیں ہے۔ عدالت نے بہت غور و فکر کے بعد ہی مجھے بری کیا ہے۔

انھوں نے مزید کہا کہ میں دو بار رام پور کی ایم پی رہی ہوں۔ میں نے کبھی کسی پر کوئی توہین آمیز تبصرہ نہیں کیا۔ میں رام پور کے لوگوں کو بتانا چاہتی ہوں کہ میں ہمیشہ آپ کی ہوں اور رام پور میں ہی رہوں گی۔