مبینہ خالصتانیوں کی لاشیں یوپی سے پنجاب لے جا رہی ایمبولینس کو نامعلوم گاڑی نے ٹکر مار دی

رام پور بائی پاس کے قریب پیش آئے اس حادثے میں کوئی جانی نقصان نہیں ہوا۔ لاشیں دوسری ایمبولینس سے روانہ کر دی گئیں۔

رام پور: اترپردیش کے پیلی بھیت میں پنجاب پولیس اور اتر پردیش پولیس کی مشترکہ کارروائی میں مارے گئے 3 مبینہ خالصتانی دہشت گردوں کی لاشیں لے کر پنجاب جانے والی ایمبولینس کو رام پور بائی پاس پر نامعلوم گاڑی نے ٹکر مار دی۔ اس اطلاع سے رام پور پولیس میں خوف و ہراس پھیل گیا۔ جیسے ہی منگل کی رات دیر گئے اس حادثے کی اطلاع ملی، رامپور پولیس نے فوری طور پر لاشوں کو تباہ شدہ ایمبولینس سے دوسری ایمبولینس میں منتقل کیا اور انہیں پنجاب روانہ کر دیا۔ اس حادثے میں کوئی جانی نقصان نہیں ہوا۔

واضح رہے کہ کل پیلی بھیت کے پورن پور میں پنجاب پولیس اور اتر پردیش پولیس کی مشترکہ ٹیم نے مبینہ طور پر خالصتان زندہ باد فورس کے تین دہشت گردوں کو انکاؤنٹر کے بعد مار گرایا تھا۔ پولیس نے ان کے پاس سے دو اے کے 47 رائفلیں، دو گالوک پستول اور بڑی مقدار میں کارتوس برآمد کرنے کا دعویٰ کیا تھا۔ پوسٹ مارٹم اور دیگر قانونی کارروائیوں کے بعد تینوں دہشت گردوں کی لاشوں کو ایمبولینس کے ذریعے پنجاب لے جایا جا رہا تھا کہ راستے میں رام پور بائی پاس پر سنواریہ فارم کے قریب ایمبولینس کو نامعلوم گاڑی نے ٹکر مار دی، جس کے باعث ایمبولینس حادثے کا شکار ہو گئی۔

پولیس سپرنٹنڈنٹ رام پور ودیا ساگر مشرا نے بتایا کہ منگل کی دیر رات لاشوں کو پیلی بھیت سے ایمبولینس میں پنجاب لے جایا جا رہا تھا۔ رام پور بائی پاس پر ایمبولینس کو نامعلوم گاڑی نے ٹکر مار دی جس کے باعث ایمبولینس کو نقصان پہنچا۔ اطلاع ملتے ہی تینوں لاشوں کو دوسری ایمبولینس میں منتقل کر کے پنجاب روانہ کر دیا گیا۔