బల్మూరి వెంకట్​ చర్చలు సఫలం - నిరసన విరమించిన నిజాం కళాశాల విద్యార్థినులు

Nizam College Students Protest Update :నిజాం కళాశాల యూజీ విద్యార్థినులు గత 6 రోజులుగా చేస్తున్న ఆందోళనలకు ఎట్టకేలకు తెరపడింది. ఎమ్మెల్సీ బల్మూరి వెంకట్ హామీతో విద్యార్థినులు తాత్కాలికంగా నిరసనను విరమించారు. వారి ఆందోళనపై రాష్ట్ర ప్రభుత్వం తరఫున బల్మూరి వెంకట్ నిజాం కళాశాల వైస్ ప్రిన్సిపల్​తో చర్చలు జరిపారు. అనంతరం విద్యార్థినులతో మాట్లాడారు.

సెప్టెంబర్ నాటికి పీజీ విద్యార్థినుల అకాడమిక్ ఇయర్ పూర్తవుతుందని, ఆ తర్వాత 100 శాతం డిగ్రీ వాళ్లకే హాస్టల్ ఉంటుందని బల్మూరి వెంకట్ వారికి హామీ ఇచ్చారు. అమెరికా నుంచి సీఎం రేవంత్ రెడ్డి రాగానే శాశ్వతంగా ఈ సమస్యకు పరిష్కారం చూపిస్తామన్నారు. మూడు రోజుల్లో అధికారిక సర్క్యులర్ ఇప్పిస్తామనే హామీపై విద్యార్థినులు హర్షం వ్యక్తం చేశారు. సోమవారం సర్క్యులర్ రాకపోతే మళ్లీ ఆందోళన చేపడతామని హెచ్చరించారు. మరోపక్క పీజీ విద్యార్థినులు తమకు న్యాయం కోరారు.