టీమ్ఇండియాకు భారీ నజరానా ప్రకటించిన శిందే

Maharashtra CM Eknath Shinde Announces Reward To Teamindia : టీ20 ప్రపంచకప్‌ 2024 విజతగా నిలిచిన టీమ్​ఇండియా ప్లేయర్స్​ను సన్మానించి, వారికి రూ.125 కోట్ల నగదు బహుమతిని బీసీసీఐ ఇచ్చిన సంగతి తెలిసిందే. ఇప్పుడు మహారాష్ట్ర ముఖ్యమంత్రి ఏక్‌నాథ్‌ శిందే కూడా టీమ్​ఇండియాకు రూ.11కోట్ల రివార్డును ప్రకటించారు. అలానే ముంబయికి చెందిన వరల్డ్ కప్​ విన్నింగ్ కెప్టెన్ రోహిత్ శర్మ, సూర్యకుమార్ యాదవ్, శివమ్ దూబే, యశస్వీ జైశ్వాల్​ను ముఖ్యమంత్రి అధికారిక నివాసం వర్షలో జ్ఞాపికలను అందించి సన్మానించారు. వారితో కలిసి కాసేపు ముచ్చటించి ప్రపంచకప్ విశేషాలను అడిగి తెలుసుకున్నారు. ఈ కార్యక్రమంలోనే టీమ్​ఇండియాకు నగదు బహుమతిని ప్రకటించారు. కాగా, 2024 టీ20 వరల్డ్‌ కప్‌ గెలిచి గురువారం స్వదేశానికి తిరిగొచ్చిన టీమ్‌ఇండియాకు దిల్లీ విమానాశ్రయంలో అపూర్వ స్వాగతం లభించింది. అనంతరం రోహిత్‌ సేన ప్రధాని మోదీని కలిసి ప్రపంచకప్ విశేషాలను పంచుకుంది.