టీడీపీ ప్రచార రథం డ్రైవర్​పై వైసీపీ కార్యకర్తల దాడి - TDP campaign vehicle - TDP CAMPAIGN VEHICLE

Attacked TDP campaign vehicle driver: చిలకలూరిపేటకు చెందిన సునీల్ తెలుగుదేశం పార్టీకి చెందిన  ప్రచార రథానికి డ్రైవర్ గా పనిచేస్తున్నాడు. ప్రచార రథంను గ్రామాల్లో తిప్పుతూ ఉంటాడు. నేడు బాపట్ల జిల్లా సంతమాగులూరు మండలంలోని ఏల్చూరు గ్రామంలో ప్రచార రథంని తిప్పుతూ రెడ్డి సామాజిక వర్గానికి చెందిన బజారుకు వెళ్ళాడు. అంతే, ఆ సామాజిక వర్గానికి చెందిన కొందరు మా బజారుకు ఎలా వస్తావంటూ రథాన్ని అడ్డగించారు. తెలుగుదేశం జెండాలను చించి, టీడీపీ ప్రచార రథానికి వైసీపీ జండాలను కట్టి ఆనందపడ్డారు. 

అంతటితో ఆగకుండా, టీడీపీ ప్రచార రథంపై రాళ్లను విసిరారు. అందులో ఓ రాయి సునీల్ కు తాగిలింది. రాళ్లు విసురుతున్నప్పుడు చేతులు అడ్డుపెట్టు కోవడంతో స్వల్ప గాయాలైనట్లు సనీల్ తెలిపాడు. అక్కడి పరిస్థితి చేయిదాటి పోతుందని గ్రహించిన సునీల్ టీడీపీ ప్రచార రథాన్ని పరుగు పెట్టించాడు. వైసీపీ నేతలు తనపై దాడి చేసిన విషయాన్ని స్థానిక తెలుగుదేశం నేతలకు తెలియజేశాడు. దీంతో స్థానిక టీడీపీ నాయకులు, సునీల్​ కలిసి పోలీసులకు ఫిర్యాదు చేశారు. ప్రచార రథంతో పాటుగా డ్రైవర్​పై దాడి చేసిన ఘటనలో కేసు నమోదు చేసినట్లు ఎస్ఐ సురేష్ తెలిపారు. దర్యాప్తు చేస్తామని, దాడి చేసిన వారిపై కఠిన చర్యలు చేపడతామని పేర్కొన్నారు.