కనకదుర్గ ఆలయంలో సుజనాచౌదరి పూజలు - రేపటి నుంచి ప్రచారం - Vijayawada West BJP MLA Candidate

Vijayawada West BJP MLA Candidate Sujana Chowdary: మంచి చేయడానికే విజయవాడ పశ్చిమ నియోజకవర్గం నుంచి కూటమి బలపరిచిన అభ్యర్ధిగా పోటీ చేస్తున్నానని కేంద్ర మాజీ మంత్రి, బీజేపీ నేత వై. సుజనాచౌదరి తెలిపారు. తొలిసారిగా ప్రత్యక్ష రాజకీయాల్లోకి వస్తున్నట్లు వెల్లడించారు. తాను స్థానికుడిని, భారతీయుడినని పేర్కొన్నారు. రేపటి నుంచి పశ్చిమ నియోజకవర్గంలో తన ప్రచారం ప్రారంభమవుతుందన్నారు. టీడీపీ ఎంపీ అభ్యర్ధి కేశినేని చిన్ని, మాజీ ఎమ్మెల్సీ బుద్దా వెంకన్న తదితరులతో కలిసి తన ఎన్నికల ప్రచార ప్రారంభానికి ముందు విజయగణపతి ఆలయం, ఇంద్రకీలాద్రిపై దుర్గమ్మ ఆలయాలను దర్శించుకుని పూజలు చేశారు. 

తన విజయానికి దేవతల ఆశీస్సులు అందించాలని కోరుకున్నట్లు తెలిపారు. కూటమి తరుపున పోటీ చేస్తున్నానని, విజయవాడ పశ్చిమ నియోజకవర్గ ప్రజలు ఆశీర్వదించాలని కోరారు. మూడు పార్టీ శ్రేణులను కలుపుకొని ముందుకు సాగుతానని  సుజనాచౌదరి వెల్లడించారు. రాబోయే ఎన్నికల్లో రాష్ట్రంలో తెలుగుదేశం, కేంద్రంలో బీజేపీ అధికారంలోకి వస్తుందని దీమా వ్యక్తం చేశారు.