ఏప్రిల్​ నుంచే 4 వేల రూపాయల పింఛన్ - అదీ ఇంటి వద్దే : అచ్చెన్నాయుడు - TDP Atchannaidu on Pensions - TDP ATCHANNAIDU ON PENSIONS

TDP Atchannaidu on Pensions: ఇళ్ల వద్దే పెన్షన్లు ఇవ్వాలని ఈసీ చెప్పినా వృద్ధులు, వికలాంగులను సచివాలయాలకు తిప్పారని టీడీపీ రాష్ట్ర అధ్యక్షుడు అచ్చెన్నాయుడు మండిపడ్డారు. ఎన్నికల్లో లబ్ది కోసం జగన్ రెడ్డే శవ రాజకీయాలు చేస్తున్నాడని ధ్వజమెత్తారు. రాబోయే చంద్రబాబు ప్రభుత్వం ఏప్రిల్ 1 నుంచి 4 వేల రూపాయల పింఛన్ ఇంటి వద్దే ఇస్తుందని హామీ ఇచ్చారు. దర్శిలో పింఛన్​దారులతో జగన్ రెడ్డి డ్రామా నభూతో నభవిష్యతి అని ఎద్దేవా చేశారు. 

మూడు వేల రూపాయల పెన్షన్‌పై అధికారంలోకి వచ్చాక మాట మార్చి లబ్దిదారులకు 32 వేలు ఎగ్గొట్టారని విమర్శించారు. గతంలో ఫించను మొత్తాన్ని 200 నుంచి 2 వేలకి పెంచిన ఘనత చంద్రబాబుదే అని, జగన్ రెడ్డి పెంచింది కేవలం వెయ్యి మాత్రమే అని తెలిపారు.  ఖజానాలో నిధులు లేకపోవడం వల్లనే ఈ నెల ఒకటో తేదీన పింఛన్లు ఇవ్వలేదని విమర్శించారు. 3వ తేదీన అప్పు తెచ్చి 4వ తేదీన పింఛన్లు ప్రారంభించారని ధ్వజమెత్తారు. ఏప్రిల్, మే, జూన్ పింఛనుతో కలిపి జులైలో 7 వేల రూపాయలు ఇంటి వద్దనే ఇస్తామని స్పష్టం చేశారు. జగన్ రెడ్డి శవ రాజకీయాల పట్ల ప్రజలు అప్రమత్తంగా ఉండాలని సూచించారు.