బోయినపల్లి వైజంక్షన్​లో రోడ్డు ప్రమాదం - ఇద్దరు మృతి - రాజంపేటలో రోడ్డు ప్రమాదం

Road Accident in Boyinapalli Y-Junction: అన్నమయ్య జిల్లా రాజంపేట మండలం బోయినపల్లి వైజంక్షన్ వద్ద సోమవారం జరిగిన రోడ్డు ప్రమాదంలో ఇద్దరు మృతి చెందారు. కడప నుంచి తిరుపతికి వెళుతున్న ఓ భారీ వాహనం రాజంపేట నుంచి గుండ్లూరుకు వెళుతున్న ఓ ద్విచక్ర వాహనాన్ని ఢీకొనింది. ఈ దుర్ఘటనలో గుండ్లూరు సమీపంలోని అన్నగారిపల్లికు చెందిన ఆచారి బ్రహ్మయ్య , రమణయ్య అక్కడికక్కడే మృతి చెందారు. ప్రధాన రహదారిపై ప్రమాదం జరగడంతో ట్రాఫిక్​కు తీవ్ర అంతరాయం ఏర్పడింది. 

పోలీసులు ట్రాఫిక్​ను క్లియర్ చేసి మృతదేహాలను ప్రభుత్వ ఆసుపత్రికి తరలించారు. పోలీసులు తెలిపిన వివరాల ప్రకారం వీరిద్దరూ కుంపిణీపురంలోని ఆలయ రథానికి మరమ్మతులు చేసేందుకు వెళ్లారు. మరమ్మత్తులకు అవసరమైన సామగ్రి తెచ్చుకునేందుకు రాజంపేటకు ద్విచక్ర వాహనంపై వెళ్తుండగా ఈ ప్రమాదం చోటుచేసుకుందని పేర్కొన్నారు. భారీ వాహనాన్ని వెంబడించిన పోలీసులు డ్రైవర్​ను అదుపులోకి తీసుకుని కేసు నమోదు చేసి దర్యాప్తు చేస్తున్నారు. రమణయ్యకు భార్య, ఇద్దరు కుమారులు కాగా బ్రహ్మయ్యకు నలుగురు కుమార్తెలున్నట్లు పోలీసులు తెలిపారు. విషయం తెలుసుకున్న కుటుంబ సభ్యులు అక్కడికి చేరుకుని గుండెలవిరిసేలా రోదించారు.