రాష్ట్రంలో ఇరిగేషన్ శాఖను విధ్వంసం చేసిన ఘనత కేసీఆర్​దే : ఉత్తమ్‌ కుమార్‌రెడ్డి - Uttam Kumar Clarity on KRMB Issue

Minister Uttam Kumar Reddy Sensational Comments on KCR : తెలంగాణ రాష్ట్రంలో ఇరిగేషన్​ శాఖను సర్వనాశనం చేసిన ఘనత కేసీఆర్​దేనని మంత్రి ఉత్తమ్​కుమార్​ రెడ్డి మండిపడ్డారు. రూ.95,000 కోట్లు ఖర్చు చేసి, ఒక్క ఎకరానికి కూడా నీళ్లివ్వలేదని ఆరోపించారు. కృష్ణా నదీ ప్రాజెక్టుల అంశాన్ని ప్రతిపక్ష నాయకులు కేసీఆర్, హరీశ్​రావు పదే పదే మాట్లాడి ప్రజల్లో ఒక అపోహ కలుగజేస్తున్నారని ఉత్తమ్ కుమార్​ మండిపడ్డారు.

ఈ విషయంలో ఎవరేం మాట్లాడుకున్నా, కేఆర్​ఎంబీకి అప్పగించేది లేదని మంత్రి స్పష్టం చేశారు. వీటిపై త్వరలో జరగనున్న శాసనసభలో చర్చ జరుపుతామని ఆయన పేర్కొన్నారు. గత బీఆర్ఎస్​ పదేళ్ల కాలంలో కృష్ణానదీ జలాల్లో తీవ్ర నష్టం వాటిల్లిందని ఆరోపించారు. అంతేకాకుండా కేసీఆర్‌, ఏపీ సీఎం జగన్‌ ఏకాంత చర్చల్లో మాట్లాడుకొని, తెలంగాణ జలాలను ఆంధ్రాకు తరలించటానికి కుట్రలు చేశారన్నారు. ఈ ఒప్పందాల్లో భాగంగానే గ్రావిటీ ద్వారా కృష్ణానదిలో వచ్చే 8 టీఎంసీల నీటిని సైతం కేసీఆర్ వదులుకున్నారని మంత్రి వివరించారు.