అందరికీ అందుబాటులో, ప్రజాక్షేత్రంలో మంత్రి లోకేశ్- కొనసాగుతున్న ప్రజాదర్బార్ - Minister Nara Lokesh Praja Darbar

Minister Nara Lokesh Praja Darbar Program: ప్రజా సమస్యల పరిష్కారించే దిశగా మంత్రి నారా లోకేశ్ శ్రీకారం చుట్టిన 'ప్రజాదర్బార్'ను రెండో రోజు కూడా నిర్వహించారు. సమస్యలు చెప్పుకొనేందుకు ఉండవల్లిలోని లోకేశ్ నివాసంలో ఏర్పాటు చేసిన కార్యక్రమానికి మంగళగిరి ప్రజలు పెద్ద ఎత్తున తరలివచ్చారు. లోకేశ్​ను కలిసి వారి సమస్యలను విన్నవించుకున్నారు. ప్రజా సమస్యలు విన్న లోకేశ్ తన సొంత నియోజకవర్గ ప్రజలకు తానెప్పుడూ అన్ని విధాల అండగా ఉంటానని భరోసా కల్పించారు. 

ఎంటీఎస్‌ సిబ్బందిని క్రమబద్ధీకరించాలని కోరుతూ వెలుగు టీచర్స్‌ ఫెడరేషన్‌ లోకేశ్​కు వినతి పత్రం అందించారు. ఆచార్య నాగార్జున విశ్వవిద్యాలయంలోని తమ సేవలను 62 ఏళ్ల వరకు కొనసాగించాలని బోధనేతర సిబ్బంది లోకేశ్​కు విన్నవించారు. నూకలపేట ఉర్దూ పాఠశాలలో 9వ తరగతి బోధనకు అనుమతించాలని ఆ పాఠశాల పేరెంట్స్‌ కమిటీ సభ్యులు కోరుతూ వినతి పత్రం అందించారు. ప్రజాసమస్యలపై వినతి పత్రాలు అందుకున్న లోకేశ్ స్పందిస్తూ వాటన్నింటినీ త్వరితగతిన పరిష్కారం అయ్యే దిశగా చర్యలు తీసుకుంటానని భరోసా కల్పించారు.