'మాకు నీళ్లివ్వండి మహాప్రభో!- ఎంపీడీవో కార్యాలయం ముట్టడించిన గ్రామస్థులు - Drinking Water Problem

Drinking Water Problem in Anantapur District : తాగునీటి కోసం ఎంపీడీఓ కార్యాలయాన్ని( MPDO ) ముట్టడించిన సంఘటన అనంతపురం జిల్లాలో జరిగింది. దండువారిపల్లి గ్రామానికి తాగు నీరందించాలని డిమాండ్​ చేస్తూ ఎంపీడీవో ఛాంబర్​లో బైఠాయించి ఆందోళన చేశారు. వారం రోజులుగా తమ గ్రామంలో తాగునీటి బోర్లు ఎండిపోవడంతో తీవ్ర ఇబ్బందులు పడుతున్నామని ఆవేదన వ్యక్తం చేశారు. తమకు తాగునీటి సౌకర్యం కల్పించామని గ్రామ సర్పంచ్, అధికారులకు ఎన్ని సార్లు ఫిర్యాదు చేసినా పట్టించుకోవడం లేదని గ్రామస్థులు వాపోయారు.

బోర్ల మరమ్మతు, తాగునీరు అందించేలా అధికారులు ప్రత్యామ్నాయ చర్యలు చేపట్టలేదని సర్పంచ్ భర్త నారాయణస్వామి మండిపడ్డారు. వేసవి కాలంలో తాగునీటి సమస్య వచ్చిందని తెలిసినా అధికారులు పట్టించుకోవడంలేదని గ్రామస్థులు ఆవేదన వ్యక్తం చేశారు. తమ గ్రామానికి వీలైనంత తొందరగా తాగునీటి సౌకర్యాలను కల్పించాలని ఎంపీడీఓ శోభకు స్థానికులు విజ్ఞప్తి చేశారు. లేని పక్షంలో ఎంపీడీఓ కార్యాలయం ముందే ధర్నాకు దిగుతామని ఈ సందర్భంగా హెచ్చరించారు.