ప్రమాణస్వీకారానికి వచ్చిన ప్రధానికి కృతజ్ఞతలు తెలిపిన చంద్రబాబు - Chandrababu tweet - CHANDRABABU TWEET

CM Chandrababu Tweet: ముఖ్యమంత్రిగా ప్రమాణస్వీకారం చేసి ఉండవల్లి చేరుకున్న చంద్రబాబుకు తెలుగుదేశం శ్రేణులు టపాసులు కాల్చుతూ స్వాగతం తెలిపారు. వివిధ రకాల వేషధారణలు, డాన్సులు వేసి అభిమానులు, కార్యకర్తలు ఆకట్టుకున్నారు. చంద్రబాబు ప్రమాణ స్వీకారం నేపథ్యంలో అన్నదాన కార్యక్రమాలను సైతం నిర్వహించారు. రాష్ట్రానికి మంచిరోజులు వచ్చాయంటూ పార్టీ సంబరాల్లో మునిగితేలారు. చంద్రబాబు ఇంటికి చేరుకోగానే పెద్ద ఎత్తున బాణాసంచా కాల్చి తమ అభిమానాన్ని చాటుకున్నారు. లోకేశ్ చేరుకున్నప్పుడు కూడా ఇదే విధంగా సందడి చేశారు. చంద్రబాబు, లోకేశ్​కు పార్టీ నేతలు శుభాకాంక్షలు తెలిపారు. 

మరోవైపు ముఖ్యమంత్రిగా ప్రమాణ స్వీకారం చేసిన సందర్భంగా ప్రజాసేవకే పునరంకితమవుతానని చంద్రబాబు స్పష్టంచేశారు. రాష్ట్ర ప్రజలకు ప్రత్యేకంగా కృతజ్ఞతలు తెలిపారు. ప్రమాణస్వీకార వేడుకకు హాజరైన ప్రధాని మోదీ, కేంద్ర హోంమంత్రి అమిత్‌షా, జేపి నడ్డా, నితిన్‌గడ్కరి, మహారాష్ట్ర ముఖ్యమంత్రి శిందేకు పేరుపేరునా చంద్రబాబు కృతజ్ఞతలు తెలిపారు. ప్రమాణస్వీకార వేడుక అనంతరం చంద్రబాబు కుటుంబసభ్యులతో ప్రధాని మోదీ ఫొటో దిగారు.