ప్రభుత్వాసుపత్రిలో వైద్యుల నిర్లక్ష్యం - కుర్చీలోనే గర్భిణి ప్రసవం - Woman Delivered on Chair

Woman Gives Birth on Chair : సిబ్బంది నిర్లక్ష్యంతో కుర్చీలోనే గర్భిణి ప్రసవించిన ఘటన నల్గొండ జిల్లా కేంద్ర ప్రభుత్వ ఆస్పత్రిలో చోటు చేసుకుంది. తెల్లవారుజామున పురిటి నొప్పులు వచ్చి శిశువుకు జన్మనిచ్చింది. ఇది గమనించిన సిబ్బంది ఆమెను వార్డులోకి తీసుకెళ్లి చికిత్స అందించారు. జిల్లా అదనపు కలెక్టర్‌ పూర్ణచందర్ ఆస్పత్రికి చెరుకుని ఘటనపై విచారణ చేపట్టారు.

Woman Gives Birth to Baby on Chair :నల్గొండ జిల్లా నేరేడుగొమ్మ మండలానికి చెందిన అశ్విని తన భర్తతో కలిసి గురువారం రాత్రి 10 గంటల సమయంలో మూడో కాన్పు కోసం దేవరకొండ ప్రభుత్వాసుపత్రికి వెళ్లింది. అక్కడి సిబ్బంది వైద్యులు అందుబాటులో లేరని, జిల్లా ఆస్పత్రికి వెళ్లాలని సిఫార్సు చేశారు. అక్కడ నుంచి అర్ధరాత్రి అంబులెన్స్‌లో నల్గొండలోని మాతా శిశు ఆరోగ్య కేంద్రానికి వచ్చింది. పరీక్షించిన వైద్యులు ప్రసవానికి ఇంకా సమయం పడుతుందని చెప్పారు.

ఈ క్రమంలో పురిటి నొప్పులు వచ్చి బయట కుర్చీలోనే కూర్చుని శిశువుకు జన్మనిచ్చింది. గమనించిన సిబ్బంది ఆమెను వార్డులోకి తీసుకెళ్లి చికిత్స అందించారు. ఘటనపై జిల్లా అదనపు కలెక్టర్‌ పూర్ణచందర్ విచారణ చేపట్టారు. ఈ ఘటన పై విచారణ చేపట్టామని అనంతరం బాధితులపై చర్యలు తీసుకుంటామని నల్గొండ జిల్లా అదనపు కలెక్టర్‌ పూర్ణచందర్ చెప్పారు.

'నేరేడుగొమ్మ మండలానికి చెందిన అశ్విని ఆసుపత్రిలో కుర్చీలోనే ప్రసవం కావడంపై జిల్లా కలెక్టర్​ ఆదేశాల మేరకు విచారిస్తున్నాం. ఈ విషయంలో ప్రస్తుతానికి ప్రాథమిక విచారణ చేపట్టాం. రాత్రి విధుల్లో వైద్యులు ఎవరు ఉన్నారని, దేవరకొండ నుంచి ఇక్కడికి రిఫర్​ చేయాల్సిన అవసరం ఏమొచ్చిందని, డాక్టర్లు లేదా సిబ్బంది నిర్లక్ష్యం ఉందా లేదా అనే కోణంలో విచారణ చేపడుతున్నాం. గర్భిణికి ఏ విధంగా పరీక్షలు నిర్వహించారని, ఎందకు ఆమె కుర్చీలోనే ప్రసవించిందని విచారిస్తున్నాం'- పూర్ణచందర్, నల్గొండ జిల్లా అదనపు కలెక్టర్‌

వైద్యుల తీరుపై కుటుంబసభ్యుల మండిపాటు : దేవరకొండ ప్రభుత్వ ఆస్పత్రికి తీసుకెళ్లగా అక్కడ వైద్య సిబ్బంది నిర్లక్ష్యంగా వ్యవహరించారని, నల్గొండ వస్తే ఇక్కడి వైద్యులు కూడా నిర్లక్ష్యంగానే ఉన్నారని కుటుంబసభ్యులు ఆగ్రహం వ్యక్తం చేశారు. వైద్యుల తీరుపై మండిపడ్డారు. ప్రభుత్వ ఆస్పత్రికి వచ్చే వారికి మెరుగైన వైద్యం అందించాలని బాధితులు కోరుతున్నారు.

'దేవరకొండ ప్రభుత్వాసుపత్రి వైద్యులు నిర్లక్ష్యం చేశారు. ఇప్పటికే దేవరకొండ ప్రభుత్వాసుపత్రిలోనే నా భార్యకు రెండుసార్లు కాన్పు అయింది. ఈసారి కూడా అక్కడికే డెలివరీకి తీసుకెళ్లాం. కానీ వైద్యులు నిద్రమత్తులో ఉండి, ఏమాత్రం చెక్​ చేయకుండా నల్గొండ ప్రభుత్వ ఆసుపత్రికి పంపించారు. నల్గొండ ప్రభుత్వాసుపత్రిలో వైద్య సిబ్బంది ఇక్కడికి ఎందుకు వచ్చారని మమల్ని ప్రశ్నించారు. డెలివరీకి టైం ఉందని వాకింగ్​ చేయమని చెప్పారు. ఆమె వాకింగ్​ చేస్తూ కుర్చీలోనే ప్రసవించింది'-ఆంజనేయులు, అశ్విని భర్త