'రెండింటిదీ ఉదాసీనతే - మేడిగడ్డ నిర్మాణ వైఫల్యంపై నిపుణుల కమిటీ వేయండి'

Vigilance Committee Report on Medigadda Barrage : మేడిగడ్డ ఆనకట్ట కుంగుబాటు విషయంలో ఇటు గుత్తేదారు సంస్థ, అటు నీటి పారుదల శాఖ రెండూ ఉదాసీనంగా వ్యవహరించాయని విజిలెన్స్‌ అండ్‌ ఎన్‌ఫోర్స్‌మెంట్‌ విభాగం ఆక్షేపించింది. ప్రాజెక్టు నిర్మాణంలో అడుగడుగునా లోపాలను ఎత్తిచూపుతూ ప్రభుత్వానికి ప్రాథమిక దర్యాప్తు నివేదిక సమర్పించింది. నిర్మాణం ప్రారంభమయ్యాక అనేక మార్పులు జరిగాయని, భద్రతకు సంబంధించిన నిబంధనల గురించీ పట్టించుకోలేదని వెల్లడించింది. బ్యారేజీ నిర్మాణ వైఫల్యంపై పూర్తి నిర్ధారణ కోసం నిపుణుల కమిటీ వేయాలని విజిలెన్స్‌ విభాగం ప్రభుత్వానికి సూచించింది.

Vigilance Committee Report on Medigadda Barrage : మేడిగడ్డ బ్యారేజీ కుంగిన ఘటనపై రాష్ట్రప్రభుత్వం నియమించిన విజిలెన్స్ కమిటీ(Vigilence Committee) దర్యాప్తులో దిమ్మ తిరిగే విషయాలు వెలుగులోకి వచ్చాయి. మేడిగడ్డ బ్యారేజీ(Medigadda) ఏడో బ్లాక్​లో 16 నుంచి 21 వ పియర్స్‌ వరకు పగుళ్లు ఉన్నాయని విజిలెన్స్ కమిటీ పేర్కొంది. త్రీడీ నమూనాకు అనుగుణంగా అప్ స్ట్రీమ్, డౌన్ స్ట్రీమ్ భారాన్ని సరి చేయలేదని తెలిపింది. 6,7,8 బ్లాకులను ఎల్ అండ్ టీ కాకుండా సబ్ కాంట్రాక్టర్లు నిర్మించారని, మేడిగడ్డలో ఒప్పందానికి విరుద్ధంగా పనులు జరిగాయని నివేదికలో స్పష్టం చేసింది.

Medigadda barrage Vigilance Report :ప్రాజెక్టు ప్రారంభించి ఐదు సీజన్లు పూర్తయినా కాఫర్ డ్యాం(Coffer Dam) తొలగించలేదని, కటాఫ్ వాల్స్, రాఫ్ట్ మధ్య ప్రణాళిక ప్రకారం అనుసంధానం లేదని విజిలెన్స్‌ తెలిపింది. ఆనకట్టకు ఎలాంటి మెయింటెనెన్స్ చేపట్టలేదన్న విజిలెన్స్ దెబ్బతిన్న ప్రాంతాల్లో మరమ్మతుల కోసం నాలుగు మార్లు నోటీసులు ఇచ్చినట్లు పేర్కొంది. 2020 మే, 2021 ఫిబ్రవరి, 2022 ఏప్రిల్, 2023 ఏప్రిల్ లో నోటీసులు ఇచ్చి మరమ్మతులు చేయాలని కోరినప్పటికీ నీటిపారుదలశాఖ, ఏజెన్సీ దెబ్బతిన్న భాగానికి ఎలాంటి మరమ్మతులు చేయలేదని స్పష్టం చేసింది.

Medigadda Barrage Mistakes :బ్యారేజీ ఆపరేషన్‌లోకి తీసుకొచ్చే ముందు తనిఖీ చేయలేదని, సీసీ బ్లాకులను ప్రాజెక్టు అథారిటీస్ కనీసం తనిఖీ కూడా చేయలేదని విజిలెన్స్ కమిటీ పేర్కొంది. 2019 నవంబర్‌లోనే ప్లింత్ స్లాబ్ జాయింట్ డ్యామేజ్ అయిందని, 2019 జూన్ 19న ఆనకట్ట ప్రారంభం నుంచి మెయింటెనెన్స్‌ లేదని నివేదికలో తెలిపింది. రాఫ్ట్, సీకెంట్ పైల్స్ నిర్ధిష్ట పద్ధతి ప్రకారం నిర్మించలేదని, ఒప్పందంలోని 50వ షరతు ప్రకారం గుత్తేదారు పనులు పూర్తి చేయలేదని తెలిపింది.

మేడిగడ్డ ఆనకట్టలోని 6,7,8 బ్లాకులను ఎల్ అండ్ టీ(L&T) కాకుండా ఉప గుత్తేదార్లు నిర్మించారన్న తీవ్రమైన ఆరోపణలున్నాయని, ఇందుకు సంబంధించి ఖాతాలు, చెల్లింపులు తదితర పూర్తి వివరాలు తీసుకుంటున్నట్లు పేర్కొంది. పనులు మిగిలి ఉండగానే 2020 ఫిబ్రవరి 29 నుంచే డిఫెక్ట్ లయబిలిటీ పీరియడ్ వర్తిస్తుందని, బ్యాంకు గ్యారంటీల విడుదలకు 2020 నవంబర్ 11న ఈఎన్సీ లేఖ రాయడం తప్పని ఆక్షేపించిన విజిలెన్స్ విభాగం ఆయనపై చర్యలు తీసుకోవాలని సిఫారసు చేసింది. ఒప్పందానికి విరుద్ధంగా పనులు జరిగాయని విజిలెన్స్ తెలిపింది. పనులు పూర్తి కాకముందే పూర్తైనట్లు ధృవీకరణ పత్రం ఇచ్చినట్లు ఆక్షేపించింది. డిఫెక్ట్ లయబిలిటీ పీరియడ్‌కు సంబంధించి ఈఎన్సీ రామగుండం ఇచ్చిన నివేదికకు ఇవి పూర్తి విరుద్ధంగా ఉన్నాయని తెలిపింది.

Medigadda Barrage Issue :మేడిగడ్డ ఆనకట్ట డిజైన్స్, డ్రాయింగ్స్, జియోలజికల్ ఇన్వెస్టిగేషన్స్​తో పాటు అన్ని ఆర్సీసీ భాగాల స్ట్రక్చరల్ ఇంటెగ్రిటీ తదితరాలను పూర్తి స్థాయిలో పరిశీలించడం తప్పనిసరని పేర్కొంది. ఆనకట్ట వైఫల్యాన్ని పూర్తి స్థాయిలో నిర్ధారించేందుకు వీలుగా నిపుణుల కమిటీని వేయాలని విజిలెన్స్ అండ్ ఎన్‌ ఫోర్స్ మెంట్ విభాగం రాష్ట్ర ప్రభుత్వానికి సూచించింది.