Industrial Hubs Will Come in Kurnool and Kadapa Districts :తయారీ రంగానికి మరింత ఊతమిచ్చేలా దేశంలోనే కొత్తగా 12 స్మార్ట్‌ పారిశ్రామిక నగరాలను ఏర్పాటు చేయనున్నట్లు కేంద్ర కేబినెట్‌ నిర్ణయించింది. దీని ద్వారా 10లక్షల ఉద్యోగాల కల్పన జరుగుతుందని తెలిపారు. కేంద్ర కేబినెట్‌ సమావేశం ఈరోజు (బుధవారం) జరిగింది. ఇందులో తీసుకున్న నిర్ణయాలను కేంద్ర మంత్రి అశ్వినీ వైష్ణవ్‌ వెల్లడించారు. ఉత్పత్తి రంగానికి కేంద్ర ప్రభుత్వం అధిక ప్రాధాన్యమిస్తోందని తెలిపారు. రూ.28,602 కోట్ల పెట్టుబడితో 10 రాష్ట్రాల్లో 12 కొత్త పారిశ్రామిక కారిడార్ల (Industrial Corridors)ను ఏర్పాటు చేస్తున్నట్లు వెల్లడించారు. ఇందులో భాగంగానే కడప జిల్లా కొప్పర్తి (Kopparthy)లో పారిశ్రామిక హబ్ కింద 2,596 ఎకరాలను అభివృద్ధి చేస్తామని వెల్లడించారు. దీని కోసం రూ.2,137కోట్లను ఖర్చు చేయనున్నట్లు తెలిపారు. ఈ హబ్‌తో 54వేల మందికి ఉపాధి లభిస్తుందన్నారు. అలాగే కర్నూలు జిల్లా ఓర్వకల్లు (Orvakal)లో 2,621 ఎకరాల్లో పారిశ్రామిక కారిడార్‌ను ఏర్పాటు చేస్తామన్నారు. ఇందుకోసం రూ.2,786 కోట్లు ఖర్చుచేస్తానమన్నారు. దీంతో 45వేల మందికి ఉపాధి అవకాశాలు లభిస్తాయన్నారు. దీంతో రాయలసీమకు లబ్ధి చేకూరనుందని కేంద్ర మంత్రి అశ్వినీ వైష్ణవ్‌ తెలిపారు.
కొత్తగా 12 స్మార్ట్‌ పారిశ్రామిక నగరాలు : అలాగే భారత్‌లో ఉత్పత్తి చేసేందుకు అనేక దేశాలు ముందుకొస్తున్నాయని, ఈ రంగంలో పెట్టుబడులు పెరుగుతున్నాయని అన్నారు. తయారీ రంగానికి మరింత ఊతమిచ్చేలా దేశంలోనే కొత్తగా 12 స్మార్ట్‌ పారిశ్రామిక నగరాలను (Smart Industrial Cities) ఏర్పాటు చేయనున్నట్లు తెలిపారు. ఇందులో ఆంధ్రప్రదేశ్‌లోని ఓర్వకల్లు-కొప్పర్తి, తెలంగాణలోని జహీరాబాద్‌, రాజస్థాన్‌లోని జోధ్‌పుర్‌-పాలి, ఉత్తరాఖండ్‌లోని ఖుర్పియా, పంజాబ్‌లోని రాజ్‌పురా-పాటియాలా, మహారాష్ట్రలోని దిఘి, కేరళలోని పాలక్కడ్‌, యూపీలోని ఆగ్రా-ప్రయాగ్‌రాజ్‌, బిహార్‌లోని గయలో ఈ కారిడార్లను ఏర్పాటు చేయనున్నామని వెల్లడించారు. ఈ ప్రణాళికలతో 10లక్షల మందికి నేరుగా ఉద్యోగాల కల్పన.. మరో 30లక్షల మందికి పరోక్షంగా ఉపాధి లభించనుందన్నారు. ఈ కారిడార్లు దాదాపు రూ.1.52 లక్షల కోట్ల పెట్టుబడులను ఆకర్షిస్తాయని కేంద్ర మంత్రి అశ్వినీ వైష్ణవ్‌ వివరించారు.