"మనుషులున్నారు జాగ్రత్త!" - రోడ్డుపైకి రావడమే తను చేసిన పాపం!

రోడ్డుపైకి వచ్చిన పెంపుడు కుక్కను ఎత్తుకెళ్లిన గుర్తు తెలియని వ్యక్తులు - యజమాని కుటుంబం కన్నీరు మున్నీరు

Pet Dog Theft in Telangana:పెంపుడు జంతువులను పెద్దపెద్ద సెలబ్రిటీల దగ్గర నుంచి సామాన్యుల వరకు చాలా మంది ప్రేమగా పెంచుకుంటారు. వారికి ఎంత పని ఉన్నా వాటికి కొంత సమయం కేటాయిస్తుంటారు. ఈ జాబితాలో కుక్కలది ప్రత్యేక స్థానం. మూగ జీవాలలో అత్యంత విశ్వాసమైన జంతువుల్లో కుక్కకే మొదటి ప్రాధాన్యం. అందుకే కుక్కలను ప్రేమతో పెంచుకుంటారు. కొంతమంది అయితే పెంపుడు కుక్కలను ఇంట్లో మనిషిలా చూస్తుంటారు. అలాంటి పెంపుడు కుక్కలకు బయట మార్కెట్​లో మంచి డిమాండ్ ఉంది. అయితే అదే రీతిలో వీటిని దొంగలించే వారు ఉన్నారు. డబ్బుల కోసం బయట అమ్ముకునేందుకు కొందరు, పెంచుకునేందుకు మరికొందరు ఇలా చోరీలకు పాల్పడుతుంటారు.

వివరాల్లోకి వెళ్తే తెలంగాణలోని పెద్దపల్లి జిల్లా మంథని మున్సిపల్ పరిధిలోని శ్రీరామ్​నగర్​లో ఇలాంటి ఘటనే చోటుచేసుకుంది. హచ్ బ్రీడ్​కు చెందిన పెంపుడు​ కుక్క చోరీకి గురైంది. శ్రీరామ్​ నగర్​ కాలనీలో నివాసం ఉంటున్న అప్పరి నారాయణ అనే వ్యక్తి ఇంట్లో ఎంతో ఇష్టంగా పెంచుకుంటున్న కుక్కను శనివారం(నవంబర్ 2)న గుర్తు తెలియని దుండగులు బైక్​పై వచ్చి దొంగిలించారు. ద్విచక్ర వాహనంపై ముగ్గురు వ్యక్తులు రోడ్డుపై వెళ్తుండగా, ఇంటి ముందు ఆడుకుంటున్న హచ్ కుక్కను చూసి దానిని ఎత్తుకెళ్లిపోయారు.

ఈ గ్యాంగ్​లో ఓ యువతి కూడా ఉండడం గమనార్హం. ఎవరి కంట పడకుండా ఆమె చున్నితో కుక్కను దాచిపెట్టింది. సీసీటీవీ ఫుటేజీలో ఈ దృశ్యాలు రికార్డయ్యాయి. కుక్క చోరీకి గురైందనే బాధతో రెండు రోజులుగా యజమాని నారాయణ కుటుంబం తీవ్ర నిరాశలో ఉందని తెలిపారు. నారాయణకు ఇద్దరు కూతుర్లు ఉండగా ఈ కుక్కను మూడో కూతురుగా చూసుకుంటున్నామని తెలిపారు. దయచేసి తమ కుక్కను తిరిగి ఇవ్వాలని వారు విజ్ఞప్తి చేశారు.

ప్రస్తుతం ప్రతి ఒక్కరి ఇంట్లో కుక్కలు, పిల్లులను పెంచుకోవడం విపరీతంగా పెరిగింది. సోషల్​ మీడియాలోని వీడియోలే ఇందుకు సాక్ష్యం. కేవలం ఒక్క జీహెచ్‌ఎంసీ పరిధిలోనే 10,500 పెంపుడు కుక్కలు నమోదై ఉండగా, రిజిస్టర్ ​కానివి మరో 42 వేలున్నాయి. నగరాలు, పట్టణాల్లో ఇటీవల పెట్‌ క్లినిక్‌లు, డయాగ్నోస్టిక్స్​ సెంటర్​లు మరింత అందుబాటులోకి వచ్చాయి. ప్రస్తుతం కమర్షియల్​ లైసెన్స్‌లు తీసుకున్న పెట్‌ క్లినిక్‌లు తెలంగాణలో 1,012 ఉన్నాయి.