Indiramma Housing Beneficiary App In Use : ఎన్నో రోజులుగా ఎదురుచూస్తున్న ఇందిరమ్మ ఇళ్ల యాప్ అందుబాటులోకి వచ్చేసింది. సర్కార్‌ అందించే ఇళ్ల కోసం లబ్ధిదారులను ఈ యాప్ ద్వారానే గుర్తిస్తారు. రాష్ట్రంలో మహబూబ్‌నగర్‌, నిజామాబాద్‌, మెదక్‌, భద్రాద్రి కొత్తగూడెం జిల్లాల్లోని రెండేసి ప్రాంతాల్లో పైలెట్‌ ప్రాజెక్టుగా ఈ యాప్‌ను ఇప్పటికే పరిశీలించారు. విజయవంతం కావడంతో దీన్ని వినియోగంలోకి తేవాలని ప్రభుత్వం నిర్ణయించింది. అధికారికంగా గురువారం యాప్‌ను సీఎం రేవంత్ రెడ్డి ఆవిష్కరించడంతో సర్వేయర్లు దరఖాస్తుదారుల ఇంటిబాట పట్టనున్నారు. ఇళ్ల లబ్ధిదారుల ఎంపిక కోసం రూపొందించిన యాప్‌తో పాటు ప్రభుత్వం మూడు ఇళ్ల ఆకృతులను రూపొందించింది. తక్కువ స్థలంలో రెండు గదులు, వంట గది, బాత్రూం వంటివి ఉండేలా ఇంజినీర్లు ఆకృతులను రూపొందించారని, యాప్‌ను సెంటర్‌ ఫర్‌ గుడ్ గవర్నెన్స్‌ అభివృద్ధి చేసిందని అధికారులు తెలిపారు.
ప్రజా పాలన కార్యక్రమంలో సొంత ఇళ్లు కావాలంటూ రాష్ట్రవ్యాప్తంగా 80,54,554 మంది దరఖాస్తులు సమర్పించగా, అందులో ఆహార భద్రత కార్డుతో పోలినవి 53,95,424 ఉన్నాయి. గతంలో 12,72,019 కుటుంబాలు ఇళ్లు లబ్ధి పొందినట్లు అధికారులు గుర్తించారు. ఆహార భద్రత కార్డుతో పోలి, గతంలో ఎలాంటి ఇళ్లు తీసుకోని కుటుంబాలు 41,23,405 ఉన్నట్లు వెల్లడించారు.
లబ్ధిదారుల గుర్తింపులో భాగంగా ప్రజా పాలనలో వచ్చిన దరఖాస్తుదారుల ఇంటికి సర్వేయర్‌ వెళ్లి, అందులో ఆయా వివరాలు నమోదు చేస్తారు. సర్వేను గెజిటెట్‌ స్థాయి అధికారి పర్యవేక్షిస్తారు. గ్రామాల్లో పంచాయతీ కార్యదర్శి, పురపాలికలోని వార్డుల్లో వార్డు అధికారి ద్వారా ఈ సర్వే నిర్వహిస్తున్నారు. అనర్హులకు ఇళ్లు మంజూరు కాకుండా ఎంపీడీవోలు, పురపాలిక కమిషనర్లు కూడా సర్వే పర్యవేక్షణ చేపట్టనున్నారు.
గుడ్న్యూస్ - ఇందిరమ్మ ఇళ్ల కోసం 'యాప్' సిద్ధం - రేపటి నుంచే లబ్ధిదారుల ఎంపిక
ఆర్టిఫిషియల్‌ ఇంటెలిజెన్స్‌ వినియోగం : యాప్‌లో కృత్రిమ మేధను ఉపయోగించనున్నారు. ఇందులో భాగంగా లబ్ధిదారుడి ముఖాన్ని గుర్తిస్తారు. ఇంటిని నిర్మించే స్థలానికి భౌగోళిక అక్షాంశాలు, రేఖాంశాల వివరాలను కూడా అందులో నమోదు చేస్తారు. ఇళ్ల నిర్మాణ ప్రగతిని ఏఐ ఆధారిత ఫొటోలు తీస్తారు. లబ్ధిదారుడికి ఇచ్చే సొమ్ము ఆధార్ ఆధారిత బ్యాంకుకు బదిలీ చేసేందుకు కూడా ఏఐనే ఉపయోగించనున్నారు.