పనితీరులో అట్టడుగున తెలంగాణ డిస్కంలు​ - జాతీయ విద్యుత్ ఆర్థిక సంస్థ జాబితాలో సీ గ్రేడ్

Telangana DISCOMs Rank Low in India : దేశంలో ఇతర రాష్ట్రాలతో పోలిస్తే తెలంగాణ విద్యుత్​ పంపిణీ సంస్థల పనితీరు అట్టడుగున ఉంది. 2022-23 ఆర్థిక సంవత్సరానికి జాతీయ విద్యుత్​ ఆర్థిక సంస్థ ర్యాంకులను విడుదల చేసింది. ఇందులో తెలంగాణకు సంబంధించిన రెండు డిస్కంలకు సి-గ్రేడ్​ లభించింది.

Telangana DISCOMs Ranks Low in India : దేశవ్యాప్తంగావిద్యుత్​ పంపిణీ సంస్థ (డిస్కం)ల పని తీరుతో పోలిస్తే తెలంగాణ సంస్థల పనితీరు అట్టడుగున ఉంది. వివిధ విభాగాల్లో కనబరిచిన పనితీరు ఆధారంగా 2022-23 ఆర్థిక సంవత్సరానికి ఈ ర్యాంకులను జాతీయ విద్యుత్​ ఆర్థిక సంస్థ (పీఎఫ్​సీ) ఈ నెల 11న విడుదల చేసింది. ఆర్థిక సంస్థలు, బ్యాంకులు డిస్కంలకు అప్పులు ఇవ్వాలన్నా ఈ ర్యాంకులను పరిగణలోకి తీసుకుని రుణాలు ఇస్తుంటాయి. తెలంగాణలో ఉన్న రెండు సంస్థలకు సి-గ్రేడ్​ వచ్చింది. వరంగల్​ కేంద్రంగా ఉన్న ఉత్తర తెలంగాణ డిస్కంకు 46, హైదరాబాద్​ కేంద్రంగా ఉన్న దక్షిణ డిస్కంకు 44వ ర్యాంకులు లభించాయి.

DISCOMs Ranking in India 2023 :మొత్తం 53 డిస్కంల పని తీరును జాతీయ స్థాయిలో ఇవ్వగా అందులో ముంబయి, దిల్లీ, గుజరాత్​, ఒడిశా, హరియాణాకు చెందిన 14 సంస్థలకు మాత్రమే ఏ ప్లస్​ గ్రేడ్​ లభించింది. మరో 4 డిస్కంలకు ఏ గ్రేడ్, 7 బి, 13కి బి మైనస్​, 11 వాటికి సి, మిగిలిన వాటికి సి మైనస్​ ర్యాంకులు లభించాయి. తెలంగాణకన్నా వెనుకబడిన రాష్ట్రాలైన ఒడిశా, బిహార్​ వంటి రాష్ట్రాల డిస్కంలు సైతం ర్యాంకింగ్​లో ఉన్నతస్థాయిలో ఉండటం గమనార్హం. దక్షిణ డిస్కంకు 19.9, ఉత్తర డిస్కంకు 17.9 శాతం పర్సంటేజ్​ మాత్రమే వచ్చింది. ప్రభుత్వ కార్యాలయాలు, పథకాలకు వాడుతున్న కరెంటు బిల్లులు చెల్లించకపోవడంతో తెలంగాణ డిస్కంలకు మార్కులు తగ్గాయి. ​

ఒక యూనిట్​ విద్యుత్​ సరఫరాకు అవుతున్న సగటు వ్యయం (ఏపీఎస్​)తో పోలిస్తే ఎంత సగటు ఆదాయం (ఏఆర్​ఆర్​) వస్తుందనేది డిస్కం పనితీరును తెలుపుతుంది. దేశంలో ఏసీఎస్​, ఏఆర్​ఆర్​ల మధ్య రుపాయికి మించి లోటు ఉన్న డిస్కంలు చాలా తక్కువగా ఉన్నాయి. రాష్ట్రంలోని దక్షిణ డిస్కంలో రుపాయి 8 పైసలు, ఉత్తర డిస్కంలో రుపాయి 19 పైసల ఆదాయం తక్కువగా వస్తుంది. దీని కారణంగా నష్టాలు పెరిగిపోతున్నాయి.

• ఉత్తర(22.2%), దక్షిణ(17.2%) డిస్కంలలో కరెంటు సరఫరా, పంపిణీ, వాణిజ్య(ఏటీసీ) నష్టాలు అంతకు ముందు ఏడాదికన్నా పెరిగాయి.
• కరెంటు బిల్లుల వసూలు సామర్థ్యం కేటగిరీలో 5 మార్కులుంటే ఉత్తర డిస్కంకు సున్నా లభించింది.

విభాగాల వారిగ ఇది పరిస్థితి
అంశం	దక్షిణ డిస్కం	ఉత్తర డిస్కం
విద్యుత్ కనెక్షన్లు	1.09 కోట్లు	65.10 లక్షలు
అందులో వ్యవసాయ బోర్లు	12.73 శాతం	19.75 శాతం
2022-23 నష్టాలు	రూ.8,147 కోట్లు	రూ.2,956 కోట్లు
చెల్లించాల్సిన బకాయిలు	రూ.29,398 కోట్లు	రూ. 11,649 కోట్లు

రావాల్సిన బిల్లులు
వినియోగదారుల నుంచి	రూ.4,199 కోట్లు	రూ.2,460 కోట్లు
ప్రభుత్వ కార్యాలయాల నుంచి	రూ.16 వేల కోట్లు	రూ.10 వేల కోట్లు