Suryalanka Beach Near AP Capital Amaravati: రాజధాని అమరావతికి కేవలం 70 నుంచి 80 కిలో మీటర్ల దూరంలోనే అద్భుతమైన బీచ్ ఉంది. అదే సూర్యలంక బీచ్. ఇక్కడకి రెండు తెలుగు రాష్ట్రాల నుంచి పర్యాటకులు భారీగా వస్తూ ఉంటారు. సుమారు 4 కిలోమీటర్ల పొడవున విస్తరించి ఉన్న ఈ సహజ సిద్ధమైన బీచ్ ఉమ్మడి గుంటూరు జిల్లాలో ప్రత్యేక ఆకర్షణగా నిలుస్తోంది.
అయితే హైదరాబాద్‌ తదితర ప్రాంతాల నుంచి వచ్చినవారు సముద్రంలో స్నానాలు చేసిన తరువాత శుభ్రం చేసుకోవడానికి మంచినీటి పంపులు, దుస్తులు మార్చుకోవడానికి గదులు లేవు. ఆ తడిసిన దుస్తులతోనే అసౌకర్యంగా తమ ఇళ్లకు తిరుగుముఖం పట్టేవారు. ఈ విషయాలు బాపట్ల జిల్లా కలెక్టర్ జె.వెంకటమురళి జిల్లా గ్రాంటు నుంచి 40 లక్షల రూపాయలు వెచ్చించి పలు సౌకర్యాలను కల్పించేందుకు నిర్ణయం తీసుకున్నారు. దీంతో సూర్యలంక బీచ్కు మరింతగా పర్యాటకులు వచ్చే అవకాశం ఉంది.
అమరావతికి దగ్గరలో ఉన్న ఏకైక బీచ్:రాజధాని అమరావతికి కేవలం 70 నుంచి 80 కిలో మీటర్ల దూరంలో ఉన్న ఏకైక బీచ్ ఇదే. ఇప్పటివరకూ ఇక్కడకు వచ్చే పర్యాటకులకు డ్రెస్సింగ్‌ రూమ్స్, టాయిలెట్స్‌ లేవు. దీంతో యుద్ధప్రాతిపదికన ఆయా వసతుల కల్పనకు కలెక్టర్ ఆదేశించారు. రానున్న రోజుల్లో సూర్యలంక బీచ్లో మరిన్ని సౌకర్యాలు కల్పిస్తామని చెప్పారు. ఈ సౌకర్యాల నిర్వహణ బాధ్యతలను స్థానిక పంచాయతీకి అప్పగించాలనే యోచనలో ఉన్నట్లు బాపట్ల కలెక్టర్ వెంకట మురళి తెలిపారు.