IAS Srilakshmi Power Misuse :ఆయనేమీ స్వాతంత్య్ర సమరయోధుడు కాదు. సామాజిక సేవా కార్యక్రమాలు చేసిన గొప్ప సంఘ సేవకుడు అంతకంటే కాదు. రైల్వే శాఖలో పని చేసి ఉద్యోగ విరమణ చేసిన ఒక ఇంజినీర్‌. మచిలీపట్నంలో ఈ ఏడాది జనవరిలో వై. నాగేశ్వరరావు స్మారకంగా ఒక పార్కును ప్రారంభించి అందులో ఆయన విగ్రహాన్ని కూడా ప్రతిష్ఠించారు. కేంద్ర, రాష్ట్ర ప్రభుత్వ సంస్థల్లో అనేకమంది ఉద్యోగులు ఏటా పదవీ విరమణ చేస్తుంటారు. వారందరికీ లేని ప్రత్యేకత నాగేశ్వరరావులో ఏముందని అనుకుంటున్నారా? ఆయన రాష్ట్ర పురపాలక, పట్టణాభివృద్ధిశాఖలో ప్రత్యేక ప్రధాన కార్యదర్శిగా పని చేసిన శ్రీలక్ష్మి తండ్రి కావడమే.
ప్రజాధనంతో నిర్మాణం :నాగేశ్వరరావు పేరుతో రూ. 2.18 కోట్ల ప్రజాధనంతో అధికారులు నిర్మించిన అందమైన పార్కును ఈ ఏడాది జనవరి 24న శ్రీలక్ష్మి ప్రారంభించారు. రాష్ట్ర గ్రీన్, బ్యూటిఫికేషన్‌ కార్పొరేషన్‌ నిధుల నుంచి రూ. 2 కోట్లు, మచిలీపట్నం నగరపాలక సంస్థ నుంచి మరో రూ. 18 లక్షలు పార్కు ఏర్పాటుకు ఖర్చు చేశారు. యుద్ధప్రాతిపదికన పనులు ప్రారంభించి పార్కు లోపల నాగేశ్వరరావు విగ్రహాన్ని ప్రతిష్ఠించారు.
అధికార దుర్వినియోగం : పురపాలక, పట్టణాభివృద్ధిశాఖ పరిధిలోని రాష్ట్ర గ్రీన్, బ్యూటిఫికేషన్‌ సంస్థ ఆధ్వర్యంలో పలు పట్టణాల్లో అమృత్‌ పథకంలో ఉద్యానవనాలు నిర్మించారు. ఈ క్రమంలో తన తండ్రి పేరుతో స్వస్థలం మచిలీపట్నంలో పార్కు ఏర్పాటు చేయించాలన్న యోచనతో ఉన్నట్లు శ్రీలక్ష్మి చెప్పడమే తడవుగా గ్రీన్, బ్యూటిఫికేషన్‌ సంస్థ అధికారులు రంగంలో దిగారు. మచిలీపట్నం నగరపాలక సంస్థ అనుమతితో అమృత్‌ పథకంలో పార్కు ఏర్పాటుకు డిజైన్లు తయారు చేయించి శ్రీలక్ష్మి అనుమతితోనే టెండర్లు పిలిచి యుద్ధప్రాతిపదికన పనులు పూర్తి చేయించారు.