'గణేశ్​ నిమజ్జనాలు' చేశారు - హుస్సేన్​ సాగర్​లో 'నీటి కాలుష్యం' పెంచేశారు - Hussain Sagar water pollution

అధిక మోతాదులో హుస్సేన్​ సాగర్​లో జల కాలుష్యం - జలచరాల మనుగడ కష్టమే

Hussain Sagar Water Pollution : హైదరాబాద్​లోని హుస్సేన్​ సాగర్​లో గణేశ్​ విగ్రహాల నిమజ్జనం ముగిసి సుమారు 15 రోజులు దాటిపోయింది. అప్పుడు నిమజ్జన సమయంలో అక్కడ విపరీతమైన జల కాలుష్యం నమోదైనట్లు కాలుష్య నియంత్రణ మండలి(PCB) వెల్లడించింది. అయితే హుస్సేన్​ సాగర్​ పరివాహకంలోని కొన్ని ప్రాంతాల్లో అధిక మోతాదులో కాలుష్యం నమోదైతే, మరికొన్నింటిలో తక్కువ మోతాదులో కాలుష్యం ఉందని తెలిపింది. లేపాక్షి హ్యాండిక్రాఫ్ట్స్​ వైపు ఐదు చోట్ల క్రోమియం అధిక మోతాదులో ఉన్నట్లు నిర్ధారణ అయింది.

విగ్రహాల నిమజ్జనానికి ముందు, ఆ తర్వాత జలాశయం చుట్టుపక్కల ఆరు ప్రాంతాల్లో పీసీబీ నీటి నాణ్యతను పరీక్షించింది. ఈ పరీక్షల ఫలితాలను తాజాగా పీసీబీ వెల్లడించింది. వీటిలో ఎన్టీఆర్​ పార్కు వద్ద రెండు చోట్ల, లుంబినీ పార్కు సమీపంలోనూ, నెక్లెస్​ రోడ్, బుద్ధ విగ్రహం, లేపాక్షి హ్యాండిక్రాఫ్ట్స్ వద్ద పీసీబీ అనేక శాంపిళ్లను సేకరించి ల్యాబ్​కు పంపారు. ఇక్కడి నీటిలోని టీడీఎస్​(టోటల్​ డిజాల్వుడ్​ సాలిడ్స్​), టీఎస్​ఎస్​(టోటల్​ సస్పెండెడ్​ సాలిడ్స్​), సీవోడీ(కెమికల్​ ఆక్సిజన్​ డిమాండ్​), డీవో(డిజాల్వుడ్​ ఆక్సిజన్​), బీవోడీ(బయోకెమికల్​ ఆక్సిజన్​ డిమాండ్​), ఫీకల్​ కొలిఫామ్, టోటల్​ కొలిఫామ్​ స్థాయిలు ఎలా ఉన్నాయో పరీక్షించి ఫలితాలు వెల్లడించింది.

హుస్సేన్​ సాగర్​ నీటిని పరీక్షించిన తర్వాత రిపోర్టు :

• హుస్సేన్​ సాగర్​లో విగ్రహాల నిమజ్జనం వేళ అన్ని చోట్ల టీఎస్​ఎస్​ అంటే నీటి అడుగున చేరే మలినాలు, టర్బిడిటీ ఎక్కువ మోతాదులో ఉందని తెలిపింది. ఆ తర్వాత తగ్గినా, నిమజ్జనం ముందున్న స్థాయికి మాత్రం చేరుకోలేదంది.
• ఎన్టీఆర్​ పార్కు, బుద్ధ విగ్రహం, లుంబినీ పార్కు వద్ద అత్యధిక మోతాదులో టోటల్​ డిజాల్వుడ్​ సాలిడ్స్​(టీడీఎస్​) నమోదు అయింది. దీంతో చర్మంపై దద్దుర్ల సమస్యలు ఉత్పన్నం అవుతాయి.
• జలచరాల మనుగడకు అవసరమైన డిజాల్వుడ్​ ఆక్సిజన్​ లీటరు నీటిలో 4 ఎంజీల కంటే తక్కువ ఉండకూడదు. అయితే హుస్సేన్​ సాగర్​లో చాలా చోట్ల 2.5 నుంచి 4 మధ్య విలువలు నమోదు అయ్యాయి.
• గతేడాదితో పోలిస్తే ఎన్టీఆర్​ పార్కు ప్రాంతం మినహా ఇతర ప్రాంతాల్లో టీడీఎస్​ స్థాయిలు ఒకేలా ఉన్నాయని తెలిపింది. ఎన్టీఆర్​ పార్కు, నెక్లెస్​ రోడ్​, లుంబినీ పార్కు ప్రాంతాల్లో కెమికల్​ ఆక్సిజన్​ డిమాండ్​ తక్కువగా నమోదు అయినట్లు పేర్కొంది.
• కెమికల్​ ఆక్సిజన్​ డిమాండ్​, బయో కెమికల్​ ఆక్సిజన్​ డిమాండ్​ స్థాయిలు పెరిగిపోయాయి. బీవోడీ పెరిగితే కాలుష్యం పెరిగినట్లేనని నిపుణులు తెలుపుతున్నారు. లీటరు నీటిలో 3 ఎంజీల కంటే ఎక్కువ నమోదు కాకుండా ఉండాలి. హుస్సేన్​ సాగర్​లోని అన్ని ప్రాంతాల్లో అంతకు మించి నమోదు అయింది.