అగ్రనేతలొస్తే ఓకే లేదంటే మాకే - ఖమ్మం ఎంపీ అభ్యర్థి ఎంపికపై ఉత్కంఠ

Khammam MP seat : ఖమ్మం పార్లమెంట్‌ నియోజక వర్గంలో పోటీపై కాంగ్రెస్‌లో ఆశావహుల సంఖ్య అంతకంతకూ పెరుగుతోంది. ఇప్పటికే భారీగా దరఖాస్తులు పెట్టుకున్న ఆశావహుల వడపోత జరుగుతుండగానే అగ్రనేతలు బరిలో దిగుతారనే ప్రచారాలు జరుగుతున్నాయి. గాంధీ కుటుంబం వస్తే అత్యధిక ఆధిక్యంతో గెలిపిస్తామంటున్న నేతలు వారు రాకపోతే తమకే ఇవ్వాలని డిమాండ్‌ చేస్తున్నారు. ఇప్పటికే ముగ్గురు మంత్రుల కుటుంబీకులు విశ్వ ప్రయత్నాలు చేస్తుండగా పలువురు ముఖ్య నేతలు బహిరంగంగా తమకే అవకాశం ఇవ్వాలని డిమాండ్‌ చేస్తుండటంతో సీటు లొల్లి తారస్థాయికి చేరింది.

Khammam MP seat :ఖమ్మం లోక్‌సభ స్థానం నుంచి బరిలోకి దిగేందుకు పోటీపడుతున్న ఆశావహుల జాబితా మరింత పెరుగుతోంది. ఇప్పటికే టికెట్‌ ఆశిస్తూ ముగ్గురు జిల్లాలకు చెందిన మంత్రుల కుటుంబీకులతో కలిపి 12 మంది దరఖాస్తు చేసుకున్నారు. సీనియర్‌ నేత రేణుకా చౌదరి టికెట్‌ ఆశించినా అధిష్ఠానం ఆమెని రాజ్యసభకు పంపించడంతో బరి నుంచి తప్పుకున్నట్లైంది. ముగ్గురు మంత్రుల కుటుంబీకులు టికెట్‌ వేటలో ముందున్నారు సామాజిక సమీకరణాలు దృష్టిలో ఉంచుకొని తమకు అవకాశం కల్పించాలని కోరుతూనే దిల్లీ పెద్దలతో ఎవరికీ వారే మంతనాలు చేస్తున్నారు.

Congress Focus On Parliament Elections : వీవీసీ ట్రస్ట్‌ అధినేత రాజేంద్రప్రసాద్‌ ఎంపీ టికెట్‌ కోసం తీవ్ర ప్రయత్నాలు చేస్తున్నారు. పార్టీ కోసం అనేక త్యాగాలు చేసిన తమకు అవకాశం కల్పించాలంటూ సీనియర్‌ నేతలు పోట్ల నాగేశ్వరరావు, రాయల నాగేశ్వరరావు, కొత్తగూడెం నేత నాగ సీతా రాములు విజ్ఞప్తి చేస్తున్నారు. తాజాగా వి. హనుమంత రావు, జెట్టి కుమార్ సైతం ఇక్కడి నుంచే అవకాశం ఇవ్వాలని కోరుతుండటంతో టికెట్‌ ఎవరికీ దక్కుతుందన్నది హస్తం పార్టీ వర్గాల్లో ఆసక్తి రేపుతోంది. అసెంబ్లీ ఎన్నికల్లో (Telangana Assembly Elections) ఉమ్మడి ఖమ్మం జిల్లాలో ఒక్కటి మినహా మిగిలిన 9 స్థానాల్లో కాంగ్రెస్, సీపీఐ మిత్ర పక్షం గెలుచుకుంది. పార్లమెంట్ నియోజకవర్గ పరిధిలోని 7 స్థానాలకుగానూ కొత్తగూడెంలో సీపీఐ, మిగిలిన 6 స్థానాల్లోనూ కాంగ్రెస్ విజయ బావుటా ఎగుర వేసింది.

Parliament Elections In Telangana : ప్రస్తుతం పార్టీ క్షేత్రస్థాయిలో పటిష్ఠంగా ఉన్నా మరింత జోష్ తెచ్చుకునేలా కాంగ్రెస్ అడుగులు వేస్తోంది. ఇప్పటికే ఖమ్మం నుంచి బరిలోకి దిగాలని పార్టీ అగ్రనేత సోనియాని ముఖ్య నేతలు కోరినా సాధ్య పడలేదు. రాహుల్‌ బరిలోకి దిగుతారన్న ప్రచారం జోరుగా సాగుతోంది. అదే జరిగితే పార్టీ శ్రేణుల్లో మరింత జోష్ పెరుగుతుందని హస్తం పార్టీ నేతలు భావిస్తున్నారు.

రాహుల్‌ గాంధీ (Rahul Gandhi) పోటీ చేస్తే భారీ మెజార్టీతో గెలిపిస్తామని ఖమ్మం జిల్లా కాంగ్రెస్‌ నేతలు చెబుతున్నారు. ఆయన బరిలో నిలవకపోతే సీటు తమదేనని ఎవరికి వారే ధీమాతో ఉనారు. ముఖ్యంగా ముగ్గురు మంత్రుల కుటుంబ సభ్యుల్లో పోటీ తీవ్రంగా ఉండగా అధిష్ఠానం ఎవరి వైపు మొగ్గు చూపుతుందన్నది పార్టీ వర్గాల్లో ఆసక్తి రేపుతోంది.