"ప్రామిస్ ఆశిస్తే అంతకుమించి బ్లెస్సింగ్స్ వచ్చాయి" - సీఎం చంద్రబాబుతో భేటీపై కపిల్​దేవ్

ఇండియన్‌ గోల్ఫ్‌ అధ్యక్షుడిగా ఉన్న కపిల్‌ దేవ్‌ - ఏసీఏ అధ్యక్షుడు కేశినేని చిన్నితో కలిసి సీఎం వద్దకు కపిల్

Kapildev Met CM Chandrababu Naidu: ఆంధ్రప్రదేశ్​లో గోల్ఫ్‌ కోర్టు ఏర్పాటు గురించి ముఖ్యమంత్రి చంద్రబాబుతో మాజీ క్రికెటర్ కపిల్‌ దేవ్‌ చర్చించారు. ఉండవల్లిలో ముఖ్యమంత్రి చంద్రబాబుని భారత క్రికెట్ జట్టు మాజీ కెప్టెన్ కపిల్ దేవ్ కలిశారు. ఆంధ్ర క్రికెట్ అసోసియేషన్ అధ్యక్షుడు, విజయవాడ ఎంపీ కేశినేని చిన్నితో కలిసి కపిల్ దేవ్ సీఎం చంద్రబాబు వద్దకు వెళ్లారు. రాష్ట్రంలో గోల్ఫ్ కోర్టు ఏర్పాటుపై చర్చించారు.

క్రీడలపై కూడా సీఎం చంద్రబాబుకు చాలా ఉత్సుకత ఉందని కపిల్ దేవ్ పేర్కొన్నారు. గోల్ఫ్ గురించి ప్రత్యేకంగా చర్చ జరిగిందని తెలిపారు. చంద్రబాబు నుంచి ప్రామిస్ అనేకంటే ఆయన బ్లెస్సింగ్ వచ్చాయన్నారు. ఇండియన్ గోల్ఫ్​కి తాను ప్రస్తుతం ప్రెసిడెంట్​గా ఉన్నానని తెలిపారు. ఎక్కడ భూమి ఇస్తారనేది ప్రభుత్వానిదే నిర్ణయమన్నారు. స్పోర్ట్స్ సిటీలో ఇస్తే చాలా సంతోషిస్తానని కపిల్ దేవ్ అభిప్రాయపడ్డారు.

Chandrababu Tweet on Meeting With Kapil Dev: లెజెండరీ క్రికెటర్, పీజీటీఐ (Professional Golf Tour of India) ఛైర్మన్ కపిల్ దేవ్, ఆయన ప్రతినిధులతో భేటీ ఎంతో ఆహ్లాదకరంగా సాగిందని ముఖ్యమంత్రి చంద్రబాబు సామాజిక మాధ్యమం ఎక్స్​లో వెల్లడించారు. అమరావతిలో అంతర్జాతీయ గోల్ఫ్ కోర్స్ క్లబ్, అనంతపురం, వైజాగ్‌లో ప్రీమియర్ గోల్ఫ్ కోర్స్ క్లబ్‌లను ఏర్పాటు చేయడంపై ప్రత్యేక దృష్టి సారించామని తెలిపారు. ఆంధ్రప్రదేశ్ క్రీడా రంగాన్ని విస్తరించడం గురించి చర్చించామన్నారు.

తద్వారా మన యువతలో గోల్ఫ్ పట్ల మక్కువను పెంపొందిస్తుందని, తదుపరి తరం గోల్ఫ్ క్రీడాకారులను ప్రోత్సహిస్తుందని స్పష్టం చేశారు. రాష్ట్ర వ్యాప్తంగా మన పౌరులకు ఇలాంటి మరిన్ని అవకాశాలు, సౌకర్యాలను కల్పించేందుకు ఆంధ్రప్రదేశ్ ప్రభుత్వం సిద్ధంగా ఉందని ప్రకటించారు. ఆంధ్రప్రదేశ్‌ను క్రీడా నైపుణ్యానికి నిజమైన హబ్‌గా మార్చడానికి క్రీడా దిగ్గజాల సహకారానికి తాము ఎదురుచూస్తున్నామని చంద్రబాబు అన్నారు.

అనంతపురం, అమరావతి, విశాఖలో గోల్ఫ్ కోర్టులు పెడతామని, ఆంధ్ర క్రికెట్ అసోసియేషన్ అధ్యక్షుడు కేశినేని చిన్ని తెలిపారు. కపిల్ దేవ్​ను రాష్ట్రానికి అంబాసిడర్​గా ఉండాలని కోరినట్లు ఎంపీ చిన్ని తెలిపారు. గోల్ఫ్​ని ఏపీలో అభివృద్ధి చేయాలని ఆలోచిస్తున్నామన్నారు. గోల్ఫ్​కు డ్రైవింగ్ రేంజ్​లు సిద్ధం చేస్తామని, మరో రెండు మూడు సమావేశాల్లో మరిన్ని విషయాలు నిర్ణయిస్తామని తెలిపారు. ఏపీలో యువ క్రీడాకారులు అంతర్జాతీయంగా ఆడేలా చేస్తామన్న చిన్ని, గ్రామీణ ప్రాంతాలలో ఉన్న క్రికెట్ క్రీడాకారులను వెలికితీస్తామని ఆశాభావం వ్యక్తం చేశారు. గ్రామీణ ప్రాంతాలలో క్రికెట్​ను అభివృద్ధి చేస్తామని వెల్లడించారు.